最近有一個關於講執笠嘅關注群組非常hit，我都忍唔住加入去湊下熱鬧，入到去果然非常有氣氛。
每一日嘅post大部分都唔係關注而係嗌交。
有人話香港嘅服務質素越嚟越差所以寧願北上消費；
有做生意嘅又覺得本地人唔願意支持本地市場，導致市場淡靜；
亦有人認為因為政府政策問題及業主不願意減租。
其實一間公司生意唔好就會開始cut人手，一cut人手就會承載力降低，留低嘅人手就會一個人做兩三個人嘅工作量，然後就會黑面，一黑面就會影響服務質素。
然後客人就會唔嚟，甚至網上唱衰你，另一個惡性循環不斷輪迴。
無論係一般市民又好業主又好還是租戶都好 ，三個角色都有一個共通點，就係習慣將所有責任推向對方。
當客人與租戶、租戶與業主成敵對關係嘅時候，就會令到生態圈愈嚟愈惡劣。
我認為有三個方向改善呢一個情況。
1. 改變經營模式
有好多傳統生意仍然未習慣用digital marketing， 有時嘗試下改變/學習宣傳渠道， 就能夠改善客量問題。
而家一街都係電腦一天都係飛機， 老闆門 (包括我自己) 你都要與時並進經常懷念曾經成功過嘅方法係冇意思嘅。
2. 賺錢唔好賺到盡
曾經聽過一個人講佢話做生意就算 幾成功都好都唔好去到盡， 畀條路行下大家都好，你賺到盡冇人承接其實一樣輸。
3. 少啲批鬥
唔知大家是否覺得近年香港人好鍾意互相批鬥。 其實互相批鬥係一種內耗，幫你將注意你集中攻擊相反觀點嘅人你就會變成為攻擊而攻擊。
做生意習慣攻擊別人而並非專注品質你又點可能吸引到好嘅客人又點可能賺到錢呢？
但假如你發現你好喜歡上網睇人嗌交、甚至你享受嗌交甚至你會開幾個分身同人一齊嗌交...
我會建議你搵專業人士好好傾一傾。
Tim Sir林雲峯
催眠治療學導師
香港催眠輔導中心創辦人