應該是《Game of Thrones》就快回歸，近期新劇都比較遜色，又或者心思全都去了期待上面，相對上感覺很多劇都十分沉悶，提不起勁去看，今日就跟大家提幾套「惡睇指數」頗高的新劇，最高的那套我已中途放棄，連我這類電視汁撈飯劇迷都棄得的劇集，大家都唔使諗了，安心等下周一龍媽回歸吧。
撰文：Carman Chan
《Gypsy》(Netflix)
Netflix hit & miss中的miss，睇到第5集放棄，Naomi Watts飾演心理醫生，有愛錫她的丈夫，及一名8歲已開始顯露喜愛同性傾向的女兒，暗地裡卻過著雙重生活，建構另一個身份去接觸她病人的家人朋友，美其名係以非一般方法去了解病人內心世界，實情卻是沉溺於自己的虛擬身份不能自拔，愛上病人的前女友。先不論這種左瞞右瞞的做法是否有違醫德，女主角本身的心理狀態都好有問題，編劇想拍人性的陰暗及扭曲狀態，但明顯眼高手低，relate唔到之餘只看到兩個女人調情懶唯美的畫面，感覺好獵奇，那種掛羊頭賣狗肉的感覺，每集睇完噁心感久久不散。我唔知Naomi Watts係咪以為這是一套想複製《Mulholland Drive》的怪異驚慄，睇怕佢係上咗賊船而不自知，最得人驚係IMDB都竟然有7.2分，幸好爛番茄的總評是罕見的低分(2.7)，不然我會懷疑自己個腦係咪有問題。
惡睇指數：★★★★★
《The Mist》(Spike TV)
又一改編Stephen King小說的新劇，講一個小鎮突然給濃霧籠罩，怪異事件接踵發生，小鎮居民只能躲避室內，形成困獸鬥局面，sounds familiar係咪？觀眾不需要再看另一套《Under the Dome》囉，而且是更差版本，由劇情、演出、視覺效果，皆可謂一無是處，仲要煞有介事拍到好似好驚慄咁，一係玩大啲去到盡大灑狗血核突場面，我都求其當爛劇睇，仲有少少感官刺激可言，玩下手仲可以扮cult，不過編劇識得咁諗，就唔會搞到目前的唔湯唔水，棄之可也。
惡睇指數：★★★★
《Prime Suspect 1973》(itv)
我見係Helen Mirren套經典《Prime Suspect》的前傳，雖然沒有Helen Mirren份，也有份好奇心想知這套經典英劇的前傳是怎樣的，故事講女幹探Jane Tennison的年輕時期，由初入行懵盛盛的學警怎樣演變成幹練的陀槍師姐，故事都講得算紮實有板有眼，可惜連拍法都似70年代年代的電視劇，鏡頭運用及節奏都溫吞吞的，極其量的優點是寫實啩我估，其實唔算惡睇，但以今日電視咁多選擇，都是可棄之列了。
惡睇指數：★★