全劇最好睇係CG大狗Lockjaw。
繼續做奸角的Iwan Rheon。
今日影劇迷，就算不看美漫的，都會給漫威同DC輪流轟炸的了，10月頭又有兩套漫威改編劇上演，ABC套《Marvel’s Inhumans》首播搬到去IMAX上，劣評如潮，我都係睇在《Marvel’s Agents of S.H.I.E.L.D.》講足幾季Inhumans分上，捱義氣睇吓佢衰成點，結論：係貼地，有佢墊底，《Punisher》定過抬油了。另外一套是Fox的《The Gifted》，沙石亦甚多，但仍可觀望多一兩集先定奪。撰文：Carman Chan
一無是處
呢套《Inhumans》首先看不順眼就是角色造型，睇漫畫係唔覺，但放在真人身上勁惡搞，Black Bolt那套皮裝好騎呢，Medusa把頭髮一郁，你係唔會覺得勁而係搞笑，Crystal頭上嗰忽highlight……成個Royal Family一字排開，你以為萬聖節早咗嚟，搞乜成班人鬼五馬六冇個正常。最正常係Maximus(Iwan Rheon飾)，我都有少少因為有Ramsay(GoT)先會想睇吓，他在此劇亦是做奸角，但角色寫到平面到唔恨，無論劇情、角色塑造、甚至所謂特效，都卡通到極點，我覺得英文的cartoonish已經好包容，用中文講，簡直係低能/弱智，雙眼活受罪。
瞬間轉移大狗
唯一得意的是有瞬間轉移能力的大狗Lockjaw，CG算做得合格，至少感覺唔突兀，看著牠想起《OKJA》隻超級豬，都係善良討好角色，爛番茄此劇評分得4%，係jaw-dropping low，如果唔係俾多，這些分都應該全數係屬於Lockjaw的了。
故事本有潛質
本來此劇的前設我覺得係有潛質的，一開首就講班Inhumans因為不想跟人類衝突，而退居到月球一處叫Attlian的地方聚居，但因為人類世界愈來愈多Inhumans遭發現，他們搜救自己人而令Attlian有人滿之患，而由於Attlian實行封建君王制度，以能力分等級，透過類似成人禮的儀式發掘每位Inhumans的潛能，若然能力一般，就會分配去最底層做苦工，這個不公平的制度令奸角Maximus有機可乘，他是國王Black Bolt弟弟，能力跟人類無異(即係無超能力)，但因為是國王細佬有得留低，不用發放邊疆做苦工，但他對兄長深感妒忌，對皇后Medusa又有非分之想，趁國王靜修發動政變奪權。
本來此劇前提是有潛質的，Inhumans的社會跟人類世界一樣充滿階級不平等，以能力將人分等級本身就違反普世價值，Maximus發動政變的原因甚至可以說是公義的，但他的手段卻非常可恥，陷害、嫁禍、甚至濫殺無辜都做盡，以公義之名行不義之舉，人性的陰暗面有好多落墨之處，但此劇就寫來平鋪直敘，成套樣板戲一般，演技又差，Black Bolt尤其恐怖，面部表情勁僵硬，簡直不忍卒睹，就算有Ramsay都返魂乏術。
國王Black Bolt因為音波功超能力令他不敢輕易發聲，只能靠表情眼神做戲，但演員表現甚差，有網友更抵死說恍如全程便秘。
Medusa把蛇髮舞動，效果超搞笑。