亞洲同東南亞電影進步神速，但講嚟講去，焦點都仍然係Bollywood片同韓片，泰國電影似乎經常被人遺忘。
其實泰國近年推出嘅劇情片都幾唔錯，有時出trip，尤其是去馬來西亞時，都會喺飛機上睇到香港冇得睇嘅泰國電影，早排就睇咗舊年作品《A Gift》，呢部其實係一部半音樂電影，以音樂、歌曲為題串連3對男女嘅戀愛故事，而男主角Chantavit Dhanasevi就係早排喺香港上映嘅泰國愛情喜劇《1日情人》男主角。
藉傳統舞蹈探討「傳統」
另一部令我印象深刻嘅係《The Crown》，係我今年年頭喺馬來西亞嘅戲院睇。片名中嘅「Crown」指泰國皇族，故事圍繞幾位年輕泰國民族舞(Nora)者與老一輩對「傳統」嘅睇法差異，無論係戲劇性抑或拍攝手法都係標準以上，舞蹈場面固然好睇，角色之間嘅衝突(言語嗰隻)都拍得緊湊，取景就唔使講啦，當然係泰國本土，原汁原味。
反映泰國基層生活
香港今年查實都上映咗好幾部成績唔錯嘅泰片，例如《容易受傷的男人》、《1日情人》及橫掃「泰國奧斯卡」金天鵝獎8項大獎嘅《戀愛病發》等，而今年金天鵝獎其他得獎作品，其實都值得一看，例如最佳男配角得獎作品《How To Win at checker(Everytime)》，此片講述主角同細佬相依為命，但哥哥即將要服兵役，年幼嘅細佬將成為孤兒，因為泰國兵役制度，係以抽籤決定你是否需要入伍，而哥哥為咗細佬將來，於是嘗試打工搵錢買通人脈。查實呢部係同志電影，但當然唔係雲翔啲friend，此片嘅男男之情若隱若現，大眾容易接受。
