![泰國GL劇](https://cdn.am730.com.hk/s3fs-public/styles/article_image/public/2024-08/18-4_0.jpg?itok=djryg_dU)
泰GL犀利
泰國影視作品一向高質,最近上映的《全職乖孫》便用淡淡的嫲孫溫情搞到東南亞地區哭成澤國,雖然電影在香港未算好hit,但票房數字都突破了600萬港元,成績都算不錯。除了催淚片之外,BL劇近年在泰國亦相當盛行,不但風頭勁過主流劇集,亦捧紅了許多新星,年僅24歲的《全職乖孫》男主角Billkin便是憑2020年BL劇集《以你的心詮釋我的愛》彈起。「男男配」大殺四方,「女女配」一樣都掂,GL劇這段時間亦在眾多作品中異軍突起。
近期最紅的GL劇,非泰國國有電視台Channel 3 HD的《The Secret of Us》莫屬,劇集由29歲的鄺玲玲和22歲的「Orm」Kornnaphat Sethratanapong主演,講述鄺玲玲飾演的美女醫生Fahlada,與Orm飾演的Earn在外國一見鍾情並墮入愛河,兩人拍拖三年後,Earn卻忽然以「鍾意男人」為由講分手兼執包袱返泰國,搞到Fahlada肝腸寸斷生不如死,到Fahlada生活重回正軌後,Earn又巧合地再出現在她眼前……講真,這套劇的劇情老土到不得了,戲軌與不少TVB劇集同出一轍,都是飛完人後又想翻撻,但只要一開劇就會覺得欲罷不能。
一套BL劇或者GL劇能夠令人追住睇,劇情有幾峰迴路轉從來不關事,靚仔靚女有分加但不是重點,最緊要還是兩位主角可否為觀眾帶來「CP感」,就好似鄺玲玲和Orm,多數觀眾都覺得前者剛中帶柔,後者柔中帶剛,配搭一凹一凸,真心襯到絕一絕。就是這份感覺令「LingOrm」紅得快,7月初兩人IG粉絲同樣只有2、30萬左右,但這個數字到月尾就已經爆升至110多萬,而她們在8月中在東涌舉行的香港粉絲見面會,逾千張門票(最貴$1880一張!)也極速被粉絲掃清,網上平台仲見到好多人收飛,黃牛頭排中間位仲炒到一萬蚊左右,明顯供不應求。
如果你有睇「泰國通」胡慧冲主持的TVB旅遊節目《冲遊泰國》,應該會覺得鄺玲玲熟口熟面,對,鄺玲玲就是亮相過幾輯的「叉燒姐」。所以最近都見到有網民話TVB走寶,當初好應該把鄺玲玲羅致旗下。當然,世事又怎會如此簡單,鄺玲玲一早就已經是Channel 3 HD藝人,更加已經是劇集女主角,要傾得成真心都好有難度。
至於鄺玲玲會否再有機會到《冲遊泰國》露面,睇胡慧冲如何回覆網民應該有答案。早排他在自己的YouTube頻道上載他與鄺玲玲拍攝的存貨,有網民就讚胡慧冲慧眼犀利點中她,豈料他回應「唔係慧眼係盲眼睇錯咗人」,覆其他人時又話「應該冇機會再合作」,到好多人以為兩人反目時,他又話「係之前佢太忙冇回應我,但已經回應咗約咗外景時間啦」,令人既驚又喜。