從倫敦回港後兩天，終於看到卓亦謙執導的《年少日記》──剛於周四(11月16日)上畫──散場時無意中聽到旁邊兩位不認識的女觀眾對話，大意是這齣戲太催淚。甲問：「頭先你有冇呼吸唔到？」乙答：「有啊，大部分時間都唞唔到氣！」絕對理解她們為何如此，因為故事圍繞原生家庭創傷、自我成長挫折、校園集體欺凌、精英主義遺害、學童自殺問題，以及成年人如何面對傷痛多個議題，很多情節令人沉重得說不出話來。電影放映至中後段時，已聽見有很多人忍不住索鼻抽泣，坦白講有一兩幕戲(老師與學生在山上大叫、父子在病房裏抱頭痛哭)我也差點「失守」，但很快又止住了。可能是自身經驗使然，相對於角色遭遇暴力對待的悲痛，施暴者的殘忍和旁觀者的冷漠更教人氣憤，尤其是「暴龍哥」鄭中基飾演的鄭自雄。
面對公眾，鄭自雄是位資深大律師，立於社會頂層，風度翩翩，成熟穩重。但在家中，他其實是性格暴躁(去到病態的程度)的丈夫和盲目追求精英主義的嚴父，經常因為妻子(韋羅莎飾)和長子有傑(黃梓樂飾)「做錯事」(說穿了，只是無法達到他那過高的要求)，感到有失面子，而對他們施以各種暴力，譬如體罰和虐打、出言侮辱、情緒勒索、經濟支配，甚至刻意摧毀心愛的人與事。父權凌駕一切，將所有家庭關係應有的愛掏空，最終釀成無法挽回的悲劇。難怪「暴龍哥」在製作特輯訪問時也這樣形容：「今次呢個角色，唉～我應該係真真正正做一次好衰好衰嘅一個人。」衰到一個程度，他曾經想過辭演。「(讀)嗰啲對白，我望住佢哋(戲中兩位兒子)嗰陣時，我個心係好唔舒服，因為冇理由會咁樣嘅。即係咁可愛嘅小朋友，點解個父親可以係咁呢？我嗰刻係想……想話我不如辭職啦，我唔係好想做。」
身為導演和編劇，阿卓(卓亦謙的別稱)受訪時對我說，完全當然明白「暴龍哥」有多難受：「Ronald先生呢本身係一個好好嘅爸爸嚟，即係佢仲會喺現場同我喺度傾，話佢個仔近排鍾意啲乜嘢，佢經常分享關於佢小朋友嘅事，我都諗緊：『咦～究竟你係咪feel到我好大壓力，於是同我傾下偈，紓緩下我嘅心情呢？』咁我覺得此其一啦，咁後尾我發覺，原來佢做一個嚴父嘅呢個戲，佢都好辛苦，即係因為呢個唔係佢私底下會做嘅嘢……其實成個劇組都好怕傷害到小朋友，尤其是Ronald，即係每次拍完，佢都向梓樂say sorry，就話：『希望冇嚇親你。』跟住阿Sean(黃梓樂)又好老成喎『冇事啦，做嘢吖嘛！』咁樣。我好感激佢(鄭中基)啊，因為佢做呢場戲呢……唔只一場啊，係好辛苦，因為佢次次做完除咗say sorry，佢都同我講，話：『導演係咪真係有人會對住一個咁可愛嘅小朋友，做一啲咁殘忍嘅嘢呢？』我就同佢講話：喺research上呢，(這些事)都經常發生㗎，真係好抱歉喇，要你哋承受一樣咁嘅事情。」
為何導演會想到邀請鄭中基來演這個角色？阿卓解釋，他深信懂演喜劇的人，其實明白悲劇是怎麼一回事，他私心希望能夠看到「暴龍哥」在鏡頭前演繹嚴肅故事的模樣。「Ronald先生大家都認識佢啦，亦都知道佢係一個好出色嘅……佢被認為係一個喜劇演員，但喺我心目中呢，其實所有嘅喜劇演員都好明白悲傷係咩事，因為喜劇係嚟自悲劇。而外國都有好多例子，即係Robin Williams(羅賓威廉斯)啊，或者係Bryan Cranston(拜仁康斯頓)做《Breaking Bad》(絕命毒師)啊，Jim Carrey(占基利)做《無痛失戀》(Eternal Sunshine of the Spotless Mind)啊，其實好多喜劇演員出身嘅人，佢哋做正劇呢都係非常之好睇，而我覺得對Ronald先生嚟講都係一樣，我經常都期望有冇一日見到鄭中基嘅正劇演出呢？但好似(以往)唔係好有，於是就覺得不如我問下佢啦，睇下佢有冇興趣啦，佢又OK喎，於是就開始咗呢個合作。」