由名導列尼史葛1979年打造嘅經典科幻片《異形》，堪稱影史上最重要電影之一，尤其是塑造角色方面，更是打破傳統，創造出一位女英雄——薛歌妮韋花飾演嘅少尉Ellen Ripley。萬眾期待嘅系列新作《異形：聖約》，薛歌妮韋花飾演嘅少尉Ellen Ripley當然缺席(唔排除會客串)，但史葛曾經表示，呢集有向1979年版本致敬成分，所以絕對唔少得一位與Ripley同等重要嘅女英雌——丹妮爾，而主演嘅就係《怪獸與牠們的產地》女主角嘉芙蓮韋特史東。
《怪獸與牠們的產地》嘉芙蓮韋特史東
《聖約》中，嘉芙蓮飾演聖約號船長Jacob(占士法蘭高飾)妻子，史葛今集做法似乎同79年版一樣，喺主線入面貫穿女主角故事，相信今次會比當年塑造得更深入，事關丹妮爾一角會先經歷喪夫，然後慢慢成長，遇強愈強。查實嘉芙蓮絕對稱唔上「美艷」，之前主演《怪》片已經引起(艾迪女)fans反彈(片末竟然鋪排佢哋撻著？)。據講史葛之所以睇中嘉芙蓮，全因為欣賞佢喺舊作Paul Thomas Anderson執導嘅《Inherent Vice》演出。無可否認，嘉芙蓮外形的確硬朗，不過，我對佢大部分舊作嘅演出印象唔深(包括《Inherent Vice》)，反而留意到佢喺丹尼波爾作品《時代教主：喬布斯》中飾演Steve Jobs前妻，嗰份強悍嘅女子漢味道，同《分歧者》系列Shailene Woodley有啲相似，而且佢好適合vintage打扮。