Viserion「turn」的一刻，好像看《The Walking Dead》，其實成集都叫人有此聯想。
唔好鬧我大題已劇透，反正全世界已透到無可再透，我衰極都是掹車邊啫！因為我有個GoT「唔好死」名單，今集Beyond the Wall已不幸死了一件，好傷心要爆了。排頭位是Arya，依次跟住有Tyrion、Jaime、三條龍、兩隻冰原狼，反而無計Jon Snow同龍媽在內，因為二人擺明係全劇「重中之重」，未到第八季中後段，都未使擔心二人安危，何況Jon早已死過翻生，故技重施呢招唔work啦。 撰文：Carman Chan
(接住下文繼續劇烈地透，雖是例牌，唔想再知要打住啦。)
編劇今集唔玩「死得人多」，因為明知重要角色全部不能死……住，點都要留住條命仔落第八季，於是就打龍媽的愛兒主意，當劇情去到龍媽不顧Tyrion極力反對，都要飛去Eastwatch北境之外營救Jon Snow，仲要帶齊3隻龍兒，我就知其中一隻「死L梗」，而且一定係Viserion。龍媽騎的是大仔Drogon，二仔Rhaegal以紀念大哥Rhaegar Targaryen命名，而Jon又係Rhaegar親生子，一定不會落在對家手中，剩下就是以紀念衰二哥Viserys而命名的Viserion了。
人鬼大戰必慘烈
D&D一直偏心大仔偏到出晒面，二仔因為跟Jon血脈相連，留牠在身邊必有後著，可憐Viserion出場至今都未有一場叫人印象深刻的戲，給Night King徵召變成對頭「龍」，反而大有發揮機會，而且人類與異鬼早已勢力懸殊，今勻仲要失去一只龍，為了谷盡下季人鬼大戰可以想像的慘烈，Viserion也算死得非常有價值。
愛到封你做皇后
雖然明白龍不得不死，而且想像Visersion變成Ice Dragon那種威風震懾，簡直badass也心感興奮，但始終是親生兒呀，看見龍媽一點也不怪責Jon Snow衝動魯莽，還要柔情萬分，心底始終幾分嘀咕；話分兩頭，今集是描寫二人情愫互生最好一集，因為雙方都流露出脆弱一面，龍媽不再一味叫人bend the knee，Jon Snow眼見她不顧自身安危飛身拯救，原本無情都逼出有情，那聲「My Queen」根本同my love無異，而龍媽不再高高在上，反而說希望不負Jon Snow這一聲「My Queen」的稱臣，變得humble有番人味，也叫我這個不肯做shipper的觀眾軟化，甘心看著二人「行埋」；加上看到今集導演Alan Taylor在《Business Insider》一篇專訪，Alan自執導第一季最重要尾兩集後回歸，回憶作者GRRM曾跟他解說，全劇最重要兩個人，就是Jon Snow及Daenerys Targaryen，唉，連George老心中也早已督定二人，還有甚麼好說。
夾硬搞到姊妹不和
至於House Stark兩姊妹鬩牆那條線，簡直離晒大譜，Arya完全變樣，Sansa反而有理有節，而Littlefinger的所謂心計，亦一點不高明，無理由會中計，不知D&D葫蘆想賣甚麼藥，如果下集沒合理收尾，仲要搞死是但一位的話，我……唉，可以點啫，總之，唔好死啊啊啊啊啊……
