世界盃球賽進化

今屆世界盃真係踢得好快，上星期一才剛開波，這麼快又到16強了，這是我不喜歡今次世界盃的地方。四年才一度，萬眾期待，連Covid大家都差不多捱過了，你踢咁快咁急做咩，畀大家享受多陣唔得嘅。所以有人說，真的不要再在冬天搞世界盃了。比起球迷，球員更辛苦，聯賽踢到中途，都未攰完又要世界盃，踢完世界盃之後又要返去踢聯賽。

不過我也有喜歡今屆世界盃的地方——補時好足。因為FIFA球證委員會主席名哨哥連拿揸旗，由今次比賽開始，球賽受阻就盡量補足，英格蘭對伊朗就補時27分鐘。補時加時不同也，補時是因為球賽受阻，或許是有人受傷、換人、入球慶祝……球賽停滯了，球員也沒在跑動，所以補時大概不會為球員燃燒額外體力。我這類低端波迷好簡單，你阻咗我睇，就補返畀我，睇耐啲多啲驚喜就開心。

至於今屆內的VAR又再「嚴謹」了，說「嚴謹」好像不對，我甚至覺得是「準繩」咗。VAR是幫助主球證決定有冇越位的，球證有很多時候都看不清楚，首先靠旁證，再靠VAR。然而，越位嘅嘢，根據球例，有就有，冇就冇，即使只是凸出了腳指公，就是對攻方有利，越位了，那就應該吹越位。如果你認為凸少少唔算，那就應該改球例，問題不在VAR，VAR只不過是強勁放大鏡而已。

對於球例會與時共進，球賽會因應科技而進化，我很樂見。從前大家還會討論「呢球究竟有冇入呢？」現在不會了，科技會告訴大家，足球有沒有入龍門白界線，答案一係入一係唔入，唔使拗。我知道有人會覺得「足球嘅樂趣係咁，要有爭議先好睇㗎嘛！」那是個人喜好了。以前可以有馬勒當拿手球入波做神，今日已經不可能，但我覺得今日的更貨真價實。哪麼是不是不會再有「球場傳奇」呢？也不是啊，美斯C朗安巴比夏籣特還在天天創紀錄呢。