傳呼服務，一Call即到(上)

1313013，Call 50，同佢講漏咗件行李喺大堂，請佢自己嚟攞番。/ Beep Beep……/ 1313033，50覆台，密碼7689……我係佢爸爸，但請你叫我梁機主而唔係梁生……

上述故事全為虛構，如有雷同「我點會咁講」。不過的確在手提電話未普及之先，通訊總是隔層沙。「危險速逃」的留言，有緣的話會再見。「抬頭望雨絲，夜風翻開信紙，你的筆跡轉處談論昨日往事……」

即時解碼，曲線鬧人

講開留言，當然並不是今日的WhatsApp或訊箱留言，而是傳呼機服務年代「留口訊」給接線生。行街Sales、服務行業、蠱惑黑幫、專業人士，如有需要找對方，即刻打去Call台落Call。仍記得九十年代初，入讀演藝學院第二星期，師兄教路要出部Call機，方便老師同學隨時搵到你。作為窮學生，月費百零蚊，根本冇得揀，只能出一部BB TELECOM必備通訊「數字機」簡簡單單。幸好簽約一年，機價全免。不過話時話，原來一日最巔峰都可以有五、六十個Call。當中當然有生日快樂，還有去唔去食下午茶？當然更有玩嘢的留言，例如「問候你伯母健在嗎？」。由於Call台不能落粗言穢語和攻擊性言詞，「你去死啦」、「賤人」、「吃蕉」、「正人渣」等等負面說話，都會被迫去正面曲線表達。香港人，真係創意無限！又講開Numeric Pagers「數字機」，即係只能以數字顯示的傳呼機。每當震動或Beep Beep響，需要回覆的電話號碼，或是特有的數字代碼便會隨即顯示。一般來來去去常用的簡單用詞，例如姓氏和地點，用家一望就知。或是透過機夾內的「密碼紙」，來簡單解讀所示的數字。但是如果連代碼都不能表達，就顯示要打返上台聽番所留口訊。加上如有突發的急事，就會有「急Call」的代碼顯示。如有一些不識做的朋友，係唔係都急Call要打番上台，枉費要落巴士找電話亭，心急緊張換來無聊事情，真係好到冇朋友。

地鐵打通，單行中文

傳呼服務直至九十年代，才於地鐵沿線打通網絡，仍記得先係太子至中環，跟著就是全條港島線、荃灣線、觀塘線，所以就算當年只得「熱狗」未有「冷馬」，自己多數都係搭巴士。仍記得突然有一天，於地鐵中收到「密碼」，感覺月費乜都抵番。

無奈「數字機」始終有它的局限，而初代Alphanumeric Pagers「字母機/即英文機」又不是我杯茶。不久終於等到可顯示單行中文的Motorola Scriptor LX2(雙行英文)，亦即是香港較多人所選用的中文傳呼機款。唯最初只能顯示20個中文字，並且親身實驗試過，如俾幾本書壓住，甚至乎只會接收怪獸字，當時又一樣要打番上台，幸好在幾個月後情況已經改善。

Call機達人，Motorola

Scriptor LX2雖然機仔細細，但是確實設計經典，全無螺絲靠邊條卡榫裝嵌，機面只得四粒掣。顯示大字型之餘加上震動及有音效Tone，一粒3A電池可頂足一個月。加上超暢順機夾的設計，甚至伸延至手提電話的StarTAC。及至雙行中文的Scriptor LX4(4行英文)誕生，不論使用上的方便、外形設計和大細，都是在港傳呼機的標誌。適逢900Mhz頻段的FLEX通訊技術協議出現，Scriptor LX4還於1995年初，配合港產電影《重金屬》而加入金色和銀色系列，並推出手提電話加傳呼秘書台服務組合。

由於全港電話號碼改為8個字，故手提號碼為9xxx1234，Call機則為7xxx1234。由於當年電話費貴，所以不重要的電話，多數直接飛線去秘書台，再透過Call機顯示訊息。(有如早期的「天地線」和「步步通」套餐。)同時間上一代舊通訊制式的Scriptor LX2亦加入不同顏色的半透明機殼，保持市場的最後佔有。時至今日，估計全港只仍約有3萬多人使用傳呼服務。由於時間緊迫不落Call，都係要運用特權施壓打電話找人攞行李。篇幅所限，下期再談。

興趣多而尋究底，愛藏物並擁思人。七十後，舊情尋。電郵：[email protected]