入境處新任處長曾國衛昨日履新見傳媒，雖然記者唔會客氣，問題尖銳，但佢表現仍然淡定，原來曾Sir同新聞界頗有淵源，皆因佢80年代於中文大學就係修讀新聞傳播系，本來夠晒正統訓練做記者，只係佢畢業後選擇投身紀律部隊，由助理入境事務主任做起，幾經歷練，結果今日做到一哥，證明條路無行錯，可喜可賀。曾Sir當年同學及師兄弟姊妹有多人現職各傳媒高層，而佢本身亦曾負責傳媒聯絡工作，怪不得面對記者駕輕就熟。
查實曾Sir於2011年升做最年輕助理處長時，已經係未來處長大熱，因之前幾年佢借調過去駐京辦，呢個駐京位係升職好位，有機會與內地各單位多些接觸，了解國情及制度，以及建立人脈，方便日後聯絡工作，至於駐京期間內地發生牽涉港人的突發事件，例如天災、車禍、流感等，如何處理都似係考緊牌。上任一哥陳國基亦同樣試過派駐北京，後來就升正。Ray在此祝曾Sir工作順利，令入境處服務愈來愈有效率。
投身傳媒工作多年，由市場研究做起，一直與公關、廣告、新聞界結下不解緣，心境永遠青春。