科大商學院院長譚嘉因(左三)與工商管理學院副院長劉夢琳(左四)，和創業學生江則希(左一)及校友鄭其森(左二)、蘇俊豐(右二)、何駿榮(右一)。
科技大學商學院院長譚嘉因啱啱履新，噚日邀請傳媒首次見面，除咗分享佢對學院嘅發展願景之外，亦適逢學院喺2001年率先開創嘅環球商業管理課程(Global Business，簡稱GBUS)，踏入15周年，譚嘉因當年亦有份創辦，所以佢都好想公布呢個專門吸引優秀尖子嘅課程成就，從昔日畢業生多獲金融機構高薪聘用，隨著社會經濟轉型，至今已愈來愈多學生不計較薪酬成為創業家。 眾所周知，GBUS嘅收生好嚴格，每年最多55人，咁多年嚟，雖然已畢業嘅校友數目唔算多，但個個都係社會精英，就以舊年嘅畢業生計，獲金融大行聘用嘅畢業生達四成，平均月薪4萬元，收入可觀。 不過，譚嘉因話近年GBUS嘅校友創業人數增加咗，所以佢同工商管理學院副院長劉夢琳都話，依家唔可以計算畢業生嘅起薪點，因為喺金融機構工作同創業的收入差距好大，而且佢哋都希望多鼓勵學生以個人興趣嚟發展。 佢哋話好難講創業的校友數字有幾多，只可以話見到有趨勢，好似舊年嘅畢業生咁就已經有7%，即係假設55人畢業就有約3人創業或受僱於startup。至於已畢業多年嘅校友出嚟創業嘅都唔少，噚日學院就安排咗4人分享經驗，提番先，其中一位其實未畢業嘅，就係讀緊4年級嘅江則希，佢與拍檔合辦網上補習平台App Snapask，業務已擴展至台灣及新加坡，擁有用戶達6.5萬，並獲選為福布斯2016年亞洲30位30歲以下初創企業(消費科技組別)創辦人。 至於另外3位，分別為創辦自動售賣機Health Addiction嘅蘇俊豐、教學及領袖培訓非牟利組織良師香港及保護兒童權益網站Dot Kids創辦人鄭其森，以及開創連線電子飛鏢機Darts Connect嘅何駿榮，佢哋都係畢業後去金融大行賺高薪，後來才創業，不過佢哋都認同當年喺GBUS鼓勵學生找尋夢想嘅風氣，成就咗佢哋今天嘅創業成果。 另外，講番商學院整體情況，譚嘉因院長話佢哋喺全球已有2萬多名校友。該學院一向鼓勵學生修讀跨學科課程，即係double major，新學年增設生物科技及商學理學士，緊貼環球社會經濟脈搏。
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。