想買一對老翻Roger Vivier方扣ballerinas，有乜咁難？上淘寶大把啦，但如果說想買一對由「CK、Tommy Hilfiger、Nine West等大牌合作的供應商製造」的老翻RV呢，咁你就要睇埋落去啦！！！
撰文：Carman Chan
網易冒牌最易
聰明的讀者不用等我開估，都估到咁把炮嘅事，只有「崛起中的大國」才做得到(同做得出)，Quartz的時裝專欄作者Marc Bain鍾意玩踢爆，最近他一篇名為 「“Unbranded” luxury items in China are like knockoffs, with one vital difference」文章，寫中國老翻高級名牌的新招，其中一間還是鼎鼎大名的科技公司網易。
Marc Bain在文中說，自2016年以來，包括Gucci、Burberry等品牌的製造商一直在與中國科技公司網易合作，在其電子商務網站「網易嚴選」銷售此類產品，即係標榜無品牌，由名牌製造商生產，暗示產品質素有保證，實際上抄足名牌貨色，好像RV方扣涼鞋、Celine及Gucci手袋，只差在沒有印或釘上品牌logo，根本就係老翻，但想用呢招避過假冒的風險及指控。
我專登上這個網頁了解一下有幾「嚴選」，其官方介紹一字不漏摘錄如下：
「網易原創生活類電商品牌，秉承網易一貫的嚴謹態度，我們深入世界各地，從源頭全程嚴格把控商品生產環節，力求幫消費者甄選到優質的商品。」
企圖蒙混過關
好在係copy and paste，不然要我將上文逐粒字打出來，都幾嘔心，基本上老翻抄到九成九，差在唔抄埋個logo，但就講到自己幾咁有商業良心及道德，真係人唔笑狗都吠；最好笑係煞有介事，文字推介上亂吹一通，企圖蒙混過關，個款明明係Celine，硬要說是Alexander McQueen製造商，不夠膽說抄Celine嗎？無用的，好似呢啲咁出色嘅老翻，無論響咩地方，都好似漆黑中嘅螢火蟲一樣，咁鮮明，咁出眾！以為無印埋個logo出嚟，就可以避過俾人踢爆侵權㗎啦咩？！
Marc Bain在文中引述《福布斯》一篇訪問，中國盈科律師事務所企業知識產權部主任潘曉寧的講法，「大多數品牌都與製造商簽下約束條款，禁止他們使用品牌進行第三方促銷，在這種情況下，網易的做法已可能構成侵權。」(原文傳送門：https://bit.ly/2Lf9q7y)