時代廣場旗艦店已於2015年12月30日閉店。
玩具反斗城/玩具多多新穎/小朋友嘅天地/價錢合理/玩具任你揀/你會開心興奮/地方又大都無比/玩具反斗城令你手舞足蹈/我哋個個都鍾意你……
一講到玩具店，就必定諗到「反斗城」。呢首入腦歌，將西洋菜街嘅億卡玩具同將軍城掩蓋。首間位於尖沙咀海運大廈嘅Toys “Я” Us真係好大。高過頭嘅貨架，排山倒海嘅玩具牆。唔使驚冇貨，最怕係冇錢，連可坐人的小型玩具跑車同單車，都可以俾你揀住玩。適逢八十年代家庭收入穩定，正值大型超級市場、傢俬、連鎖食肆，以及玩具店進駐香港成功搶灘。加上逐漸做埋全港獨大嘅玩具代理，點止反斗，簡直反轉整個零售批發市場。
玩具叫生活豐富
係「斗斗」真係有好多難忘回憶，其1986年正式駐港，適逢《變形金剛》卡通及玩具在香港推出，雖然Transformers比美國遲了兩年播放，但係配合斗城的出現，叫我差不多每兩個星期都會去一次。仲記得當年同時推出抽獎，幸運兒可於1分鐘內任攞玩具嘅宣傳，自己仲會特登去計劃購物車行車路線，期望可以成為下一個萬元玩具嘅貪心人士。直至後來海運店舖重新搬遷，感覺細咗同冇咁好行，大個咗點都想搵番呢一份童年時代烙印的精彩驚喜，所以紐約店實在係必到的景點。
斗城令廣場歡樂
New York同為寸金尺土嘅地段，尤其係坐落於時代廣場嘅斗城旗艦店，足以顯出美國玩具店商的尊貴。旗艦店於2001年開業，一入舖已經有Geoffrey店長同你影相(應該係取名長頸鹿英文字giraffe的近音)。約18米高嘅室內摩天輪，正好用盡四層樓高。又講開高度，不論紐約地標自由神像(Statue of Liberty)、帝國大廈(Empire State Building)，又或者美國本土Marvel嘅Hulk等等卡通或者電影人物，都會由LEGO(樂高)積木去縮細砌出，仲可以近距離觸摸同影相，呢啲咪就係細個係新世界中心「樂高展」的難忘回憶囉！
果然斗城不是斗室，每個玩具品牌的展覽和銷售區，都有如香港昔日玩具店的大小，部分還設有宣傳大使哥哥姐姐和你一齊暢玩，將玩具的吸引展現。而時代廣場嘅呢間旗艦店仲有一個特色，就係店外大街充滿着卡通人物，隨時可以和他們影相，帶出玩具的深藏意義，就是與人相處的文化。亦正如同樣以玩具為題材的電影Toys Story一樣，玩具係要俾人玩嘅。(香港中文翻譯亦取了《「反斗」奇兵》，相信亦是因為反斗城名字深入民心所至。)
遷出如時代結束
可惜於2015年12月30日下午6點，呢間位於時代廣場7大道夾百老匯大道44街的玩具反斗城難敵貴租，正式DQ關店，一代玩具店的風光隨著時代而結束。而自1948年由25歲嘅Charles Lazarus創立的Children’s Supermart，於接近70年後的今年，貴為全球玩具及嬰兒產品的最大零售商，亦於美國申請破產保護。
真希望有如這句歌詞：「I don’t wanna grow up, I’m a Toys “Я” Us kid, they got a million toys at Toys “Я” Us that I can play with」只玩玩具，隨心而話，無懼算帳，不被DQ，不用長大，童年多好。