目前全球多國正受糧食危機威脅，其中東非災情最為嚴重，共2,000萬人捱餓，情況危急，多個國際非政府機構，包括香港紅十字會、樂施會、國際培幼會(香港)、香港救助兒童會及愛德基金會，於是首次為東非糧食危機聯合舉辦「六月『非』餐」籌款活動。為了引起社會關注，昨日他們邀請咗曾俊華、方力申、吳安儀與莊陳友出席記招，仲請佢哋體驗食「非」餐，食材包括薯仔皮、粟米及雜豆等，薯片叔叔曾俊華被分配食薯皮，佢仲好快食晒，一片都無嘥。
同場嘉賓方力申就食青豆，吳安儀食西蘭花，莊陳友就食粟米，佢哋都話食物好味，但喺東非就無可能食到，聽曾到當地的救援機構人士講，災民現時的食物，好多都係樹葉同野草，因此呼籲市民關注東非災情，捐款救助。
如果大家希望協助救濟災民，可於6月期間，選擇任何一餐，以減量及進食最簡單原始的食物僅作餬口，除了青豆薯皮之外，亦可以只食白粥或無肉類的粉麵等，然後捐出日常飯餐的飯錢予上述提及的其中一家機構，同時將該餐簡餐的照片或短片上載至社交媒體，FB或IG均可，tag三位朋友，加上#六月非餐 #東非 #糧食危機，協助喚起身邊的朋友關注。Ray會立即參與，希望大家都響應。