今時今日仲講顧住打機係廢青，真係好out！連李嘉誠基金會都贊助電競活動，可見打機幾有前途。基金會希望緊貼社會新節奏，於是藉著今年回歸廿周年，由本月29日至下月9日喺黃埔新天地，與HKEsports合作舉辦「香港競XP」活動，期間會推介Nomadic實境虛擬體驗，並與3香港及Razer合作，設下「電競打擂台」，為大家提供免費節目，與青年人開開心心共度假期。
活動已經開始宣傳，上去HKEsports的FB睇下，見到兩張改圖加咗誠哥個樣，其中一張仲寫住「唔係廢青，係精英！」，另一張就寫住「我要你隻英！」，個status仲有意思，寫埋誠哥金句：「凡是不該花的錢，一毛也不願意浪費」，即係話贊助電競係值得嘅！
梗係，用數字話俾你聽，2016年全球電競產業市場規模為4.6億美元，估計2019年達到11億美元，背後更衍生遊戲軟、硬件的創意創新，促進實境虛擬技術的發展。就好似上文提到嘅Nomadic，呢間美國公司今次將會提供的技術，就會為香港引入首個走動式、虛實場景結合體驗，令玩家置身其中感受到前所未有的逼真感；仲有Razer，就會邀請世界知名電競好手來港與玩家切磋，讓大家可以免費參與《英雄聯盟LOL》、《FIFA17》、《街頭霸王》、《部落衝突：皇室戰爭》等熱門電玩遊戲。
