《重啟人生》
《The Fall Guy》
上年有套日劇非常好看，叫《重啟人生》，是很幽默的喜劇，現在香港區Netflix也有，講的就是投胎。我們好間唔中也會被問到一條奇幻的題目：「如果俾你投胎，你會揀做咩人呀？」有些人會嘗試扭橋，搞笑。「做咩人？梗係有錢人啦！」為免大家太搞笑，再問清楚一點：「俾你投胎，你會揀做咩國籍嘅人？」
我知我知，愛國人士會搶住舉手答甚麼，但真正內心又是甚麼答案，也只有他自己知；就好像不少人口裡支持一套，子女就在外國讀書學習另一套。而我每次看完一些很厲害的荷李活作品，就會自然的想，嗯，如果我是美國人，一定會覺得好威。
最近上映的《The Fall Guy》你看了沒有？這只是一套故事沒甚麼深層寓意的喜劇，我不敢說這是甚麼偉大巨獻，但戲內的畫面、節奏、特技、演繹以至宣傳等等，都是「荷李活表演式」示範，他們的水平就是如此的高，而且是很常見很基本的。也就好像近年F1的Max Verstappen，他贏冠軍已經變得很普通，大家都習慣了，不拋離第二位15秒以上，似乎反而有點失手。他們都很威，而且習以為常。你又試幻想，如果大家在一個國際活動上，聊聊大家喜歡甚麼電影，九成九的一定是數荷李活的，如果有人突然講得出《花樣年華》，你會好榮幸：「多謝，呢套係香港電影，我係香港人。」
「投胎就梗係做白人。」莫論你有冇歧視人，人亦能歧視你，世界總是充滿歧視，所以能夠揀就揀最少被人歧視的人種。歧視是罪，反歧視大概不是罪——你有沒有留意，白人無論去到哪裡，被欺負的可能都好像低一點。「白人都有好多國籍嘅，俄羅斯人都白。」「梗係做北歐人。」北歐好多國家都被譽為人類的天堂，在那邊出世好像會容易幸福一些。
反而我猜不到我的朋友竟然咁樣答我。「唔揀做咩人得唔得？」「即係做咩？」「我會想做柴犬。」「吓？」「乜嘢人都有露宿者，但我真係冇見過流浪狗係柴犬，我覺得全世界嘅柴犬都好幸福，有人照顧，仲幸福過人。」