農曆新年臨近，梗係唔少得辦年貨，Ray最鍾意傳統風味，就係行年宵，就算買唔到嘢去趁吓熱鬧都好，順便可以觀察市況。東港城室內年宵市場啱啱開鑼，聽講吸引唔少市民跨區幫襯，仲清晨就去排隊搶購8元一株嘅蘭花「運財童子」，呢款年花限量100株，唔夠25分鐘就售罄。
面對經濟不明朗，年花仍然好賣，香港年花大王賴榮春話，市民一般都想買好意頭嘅年花沖喜，加上今年花價與往年相若，所以相信唔會影響銷情。不過，除咗價錢，最緊要都係啲花開得靚，香港蘭花大王楊小龍就教路，今個冬天天氣較熱，花場都要開冷氣為蘭花降溫，避免提前開花，所以建議市民買咗蘭花返屋企後，最好擺喺通風位置，可以令蘭花更耐看。
開市首日銷情不俗，新鴻基地產代理租務部總經理鍾秀蓮就預計，今年為期14天(1月14日至1月27日)的室內年宵市場，可吸引達120萬人次入場，營業額預期達1,000萬元，兩者均較去年升5%。
