富二代建議年輕人要「犧牲」，「睇少啲戲，去少啲日本」，儲錢買樓，但現時樓價之癲，莫講月入三萬的Sales，連月入四萬幾的新入職廉署調查主任都難以負擔。正所謂高薪養「廉」，廉署對同事一向不薄，員工待遇還包括宿舍！
想當年，我第一日返工，由於入職課程要等齊人才開班，於是被派去調查小組attach(Sorry,唔記得中文點繹，總之就無咩做，自修背下law，等開班啦)。新仔到場，一眾師兄師姐例牌逗一逗，起起底。師兄知我家住屯門，即時有筍嘢益我，原來廉署每三個月會分配一次宿舍，屯門有一個「細單位」空置，剛巧當日是截止申請日，叫我如果有興趣，就即時入紙申請。
我問師兄幾錢租，師兄冷笑一聲：「平到你唔信！」原來租金是按人工計算，我已忘記是人工的7%還是7.5%，當時入職月薪是三萬多，即是月租只需二千多元。正如林鄭口頭襌「機不可失」，我即時稟告太座，誰知太座：「你啱啱返工，都唔知做得幾耐，睇定啲先啦。」正所謂「聽老婆話會發達」，我於是婉拒師兄好意，繼續留守屯門寒舍。
當年樓價仍未癲狂，很多廉署前輩都有私樓揸手，甚至有好多層樓（絕對講堅，稍後再講），屯門宿舍，位處邊陲，對他們而言，返北角總部猶如二萬五千里長征，因此居然出現「有屋無人住」的情況，三個月後，「細」單位無人申請，再現吉屋名單，當時我正接受入職訓練，仍未出班，但租金實在太吸引，於是極力遊說太座。
太座最終同意去睇樓，宿舍位於屯門醫院毗鄰，前身是醫生宿舍，之後改為紀律部隊宿舍，共三座，一梯兩伙。所謂「細」單位，其實是相對的，因為大單位有2000幾呎（唔記得2300，定2800呎），我睇的單位是1400呎，屬全宿舍最細，因此「細」單位名符其實。
入到單位，發現實用率超高，按現時發水樓標準，近乎2000呎建築面積，五間房，如交「波叔」發展，絕對可劏近二十間細房。全屋無窗台，有露台，足可連開三枱麻將。三邊窗，300呎大廳向正南，打開露台門，風扇都唔使開。二千蚊租金，包差餉地租、兩個車位、全屋翻新、日常維修。如此超筍盤，邊度搵？太座見屋如見我，一見鍾情，指示我立即入紙，不得延誤！太座下旨，最終當然Mission accomplished！
後記：至今我都無「去少啲日本」，因為我從未去過，但絕不是因為顧及馮煒光遊日時所指的「父執輩在日本鐵蹄蹂躪的感受」，只因我和《大時代》中周慧敏一樣，慳慣。
FB：http://goo.gl/NprQPZ