「你剛才講，Officer LAM拉咗你之後，坐車返廉署途中曾經同你講過嘢，但佢本notebook無相關紀錄。我向你指出，佢當時教唆你誣衊我的當事人，以免除自己刑責，所以佢 無將對話寫落notebook，係唔係？」辯護大律師終於找到案件的「缺口」，必須以懾人威勢全力狙擊，希望打甩污點證人王仔的口供，令被告阿陳脫罪。
王、陳二人既是大學同窗，更是同房。陳為人進取硬朗，王則內儉溫文。 畢業後一同考入政府，同撈同煲，情同手足。可能個性決定命運，阿陳官運亨通，王仔知足淡泊。
正所謂「人心不足蛇吞象」，阿陳雖貴為高級公務員，為了攞盡政府的房屋津貼，他求王仔幫手，用王仔的名義持有自己的物業，再扮租客申請政府租金津貼，用作供樓。
王仔明知租金津貼不可用作租用自己物業，但當年「個個都係咁做」，同阿陳親過親兄弟，於是同意「捱義氣」，做個掛名業主，雖然自己一毫子都無袋，誰知還是種下禍根！
當日我和助手在王仔部門的會議室「恭候」，時間仿似停頓，忽然傳來敲門聲。溫文爾雅的王仔隨著他的上司入房，見到兩名目無表情的西裝友，面上一瞬間的狐疑變成憂懼，仿佛已知來者何人。
我取出委任證，道明身份，然後宣布拘捕和作出警誡，王仔平靜地聽着拘捕原因，回想前塵，面容由憂懼化為解脫。
王仔始終不是奸惡之徒，毫不掩飾心中所想，我這個棋手，觀人於微，早已盤算如何終局……
E-mail：[email protected]