「今時今日咁嘅服務態度唔夠㗎」反映市民對客服的要求愈來愈高，但一啲高質服務員工，Ray認同應表揚，故昨日出席咗恒隆地產表揚一些用心服務客戶的員工，舉行嘅「綠寶石客戶服務獎」活動，評委會話，今屆超過220份中港提名，選出最後5個得獎個案，因為出色個案為數不少，故開會都開多咗。
其中一個得獎者是在淘大花園任職高級保安員嘅吳淦輝(中)，當日接報指有獨居長者於淘大花園一單位內感到不適，但佢上門發現該單位並冇長者居住，不少人會當惡作劇就算數，但吳卻不放心，翻查屋苑獨居長者名單，逐一致電，結果其中一人未能聯繫。
吳向上級匯報後，決定報警求助。消防員及警察到場，破門入屋，發現一名80歲的婆婆暈倒地上，立即送婆婆到醫院救治。吳擔心破門後單位變中門大開，故主動聯絡單位業主，提醒要維修鐵閘同大門。婆婆出院後，佢亦有慰問婆婆身體情況。好人好事，值得嘉許。圖為恒隆地產主席陳啟宗大仔執行董事陳文博(Adriel，右)及另一執行董事陳家岳(Norman)與得獎者吳淦輝合攝。