中原集團主席兼行政總裁施永青於昨日於集團與科技公司簽約儀式後，趁各大發展商賣樓代表都俾面出席，同場公布將逐步交棒予兒子施俊嶸(Alex)，而Alex會擔任施老闆私人助手，即Assistant to Chairman。施老闆話，每間公司都要新陳代謝，安排接班人，而佢唔係真的完全退下來，只想自己多點時間，不過大家有事可以先搵Alex，包括傳媒查詢都可以。
現場記者直接問幾時交晒棒，有冇時間表，施老闆笑笑口話，交棒唔係交俾一個人咁簡單，而「接唔接得住要睇佢造化」，要有一定不確定性，年輕人保持有危機感，先至會繼續努力，呢個答法都好有施生特色。有記者即場問Alex對樓市睇法，佢笑言自己尚未置業，但認為市場逐漸消化加息因素，加上政經環境理想，料樓價會保持在高位緩緩上升，同施生睇法又差無幾。
施俊嶸現職中原數據科技董事，一向主力發展科技資訊業務，昨日係中原數據科技與3D領頭企業Matterport簽約成為策略夥伴，以確認中原網頁及流動應用程式擁有全港最多的虛擬實景(VR)睇樓影片，施俊嶸亦上台負責介紹中原VR搵樓平台的優勢，表現淡定。佢話加入集團兩年多，對業務認識更多，是接手好時機。