一年書展又到，每年都覺得書展好快嚟，唔覺唔覺又一年………
無奈近年因為各種工作纏身，唔可以好似以前後生咁，去足咁多日，企足咁多日，每日馬拉松式簽足十個八個鐘，一篤尿都去唔到，彼時正年輕，豈有豪情似舊時，加上唔同年紀唔同階段就要做唔同嘅嘢，今年書展撞正另一個大project要兼顧，分身不暇，只能喺星期六日喺出版社攤位現身，但都唔欺場，由中午兩點簽到晚上十點，都算有heart啦啩？
好多人都問我今年出幾多本書，係咪好似之前咁一年十幾本，無啦，今年只係得兩本散文集，都係專欄結集，因為實在冇時間寫………
近年啲時間擺多咗喺劇本創作，小說已經幾乎冇寫咁滯，奇就奇在小說其實真係冇年份所限，早排出埠拍嘢，先有啲幕後手足話睇過我《火鳳》外傳小說，仲問我點解唔繼續寫，我只能笑笑口答佢，原本前一兩年我花咗足足兩年時間寫《火鳳》外傳小說劇本，因為有內地影視公司買咗版權，甚至連演員都已經斟好咁滯，但最後又因為各種原因胎死腹中，依家講起《火鳳》小說，都只係得遺憾兩個字，再加一殼眼淚………
我相信一切都有timing，時機未到，你幾努力都冇用，時機一到，你想推都冇得推，想避都冇得避，尤其近年經歷嘅嘢令我明白到，其實最後都係「我且盡力」四字，得之我幸，不得我命，只要問心無愧，就無需逢人解釋交代一切………
每年書展，我都會因為讀者多年嚟嘅不離不棄同熱情支持而叉足電，可以繼續努力捱足一年，今年雖然嚟簽名嘅日子短咗，但都希望可以同每個迫入嚟支持我嘅讀者好好敍舊合照，訴說呢一年各自嘅經歷………
各位，風雨無阻，書展見！
