講到食同玩，香港人花錢就最疏爽，幾萬蚊報團去旅行，簡直濕濕碎，之但係，如果花16萬(每位)過日本關西玩6日，你哋又捨唔捨得？
EGL東瀛遊執行董事禤國全(右3)，與瑞風推進事業部部長岡田學(右4)，在記者會上簽訂合作協議。
話說昨日東瀛遊連搞兩場event，包括傳媒午宴及記者會，執行董事禤國全連走兩場，就係為咗推廣佢哋最新推出嘅「『瀛遊達人』禤國全 隨風出發『瑞風』尊貴列車 京都祇園祭、鐵道美食6天之旅」，我阿Ray當然要八下係咩料。
話說「瑞風」尊列的車票，喺日本既昂貴又搶手，可謂一票難求，而之所以咁巴閉，全因設施和膳食夠晒豪華矜貴，包括玻璃觀景展望車廂、配備私人陽台及華麗浴室的套房，還有由同獲米芝蓮三星的和食名店「菊乃井」三代目主廚村田吉弘，以及法式料理HAJIME主廚米田肇等人監修的和洋料理等。行程安排京都、岡山、東浜、嵐山和祇園前夜祭等，乘坐國泰Business Class，其中兩晚分別入住京都四季酒店及京都翠嵐豪華溫泉酒店，每項細節都屬頂級，難怪每位團費最貴要成164,888元(7號車廂整卡為一間頂級套房，內有寢室及客廳；入住其他車廂團費則為112,888元)。
禤國全同Ray講，雖則團費超過10萬，但只要睇番行程中各項安排，就會發覺絕對物有所值。佢仲好有信心咁話：「我相信聽日(即今日)推出，晏晝就會爆滿。」
