香港人要明白，上面都有交數壓力。為咗政改同埋睇實路福西領袖，上面已經出盡咗好多力。上面港澳事務嘅人事全部轉晒，西環人事全面變晒，最後一個標杆性之人物：硬到如河川嘅部長都要突然北上，仲同白宮發言人一齊響同一間大學添。
為咗政改，舊年年初開完一輪炮火之後，年中西環小明接手打溫和牌，仲有「好打得」幫手推一推，一下子氣氛好咗。按照上面Plan A思路，應該舊年底開始有更頻繁嘅互動，今年年初會有一些進展。
點知響兩會之前，真係乜鬼進展都冇。大佬呀，江叔貴為小組阿頭，搞咗成年，身水身汗，乜鬼向前走，有商有量，影都冇，梗係火滾啦！而且，輿論上又唔係好佔到上風。好明顯，呢個唔係原先之game plan。上面見唔到有任何向前走之跡象，兩會之時梗係會畀人問責啦，一層一層咁壓落去，結果梗係有人要人頭落地，變陣，(扮)發老脾。
經過呢個星期之變化，表面上係玩輿論戰，叫人去發聲(或者學珠姐話齋去多些把鬼當歌節目)。但戰爭係講立體，而唔會只有發聲。見到嘅就唔係立體戰，見唔到嗰啲先至緊要。
換言之，響炮聲隆隆底下，泛民點樣應變而已。炮火越大，越要冷靜。有人響戰場上，放炮放煙霧彈放手榴彈放高射炮，製造咗一個賓墟嘅場面，迫你就範，咁係未等於要傾呢？其實，場面越大，頭腦就要越冷靜，思路就要越清晰，想法就要更堅定，先至可以化險為夷。
依家上面咁樣開炮，畀人印象係，依家好似畀人感覺係，上面好恨想要普選，但有一堆泛民阻頭阻勢。既然係咁，泛民就要借勢，將呢個印象強化落去，響輿論上，將上面打成一個強人所難，恃強凌弱，以大欺小，由上而下，上面比泛民更想要香港社會硬食一個半鹹淡選舉之形象。呢個形象，就要響月底嘅基本法研討會之前不斷滲出去，響方方面面，透過地區單張，地區報咁樣滲出去。如無意外，三月底之護法大使一定語氣強硬、惡形惡相、大聲夾惡、眼神凌厲，咁樣就可以響地區各階層，響地區上，強化上面蠻不講理之形象。
響兩會之後，兩會班建制大姐大哥一定空群而出迫泛民放棄三軌去談判。呢個時候，最好的方法，就係刺激呢班友出來亂講嘢。一般而言，建制之資深政客，特別係有選舉經驗之議員，講嘢會有分寸，但除此之外，大部分嗰啲講嘢，好多時會好大膽，往往有驚人之語，幫上面倒米。所以，只要刺激呢班勇武之建制大姐大哥大膽講嘢，就會不斷幫倒忙，響輿論上令建制派不斷失分。
如此，由於建制派不斷出口術倒米，上面開始怕民意越來越反北京，於是，就開始會有空間傾嘢。
咁樣，泛民班溫和務實朋友，就至有空間同考慮，係未只有一軌之情況下，仲願意同上面傾。但係，依家溫和派都在分裂之中，好難響短期內傾得出一個所以然。唔！