AM730位處灣仔，周圍好多食肆，乜嘢檔次都有得揀，Ray同行家講起晏晝搵食，佢哋都好羨慕㗎，好似有時約客食飯搵間高檔嘅食肆都好方便，例如喺新鴻基中心裡面嘅海都海鮮酒家，Ray有時都會幫襯，除咗因為啱feel又啱食之外，仲有啲感情因素，就係呢度都見證住報業嘅興衰。
話說當年《蘋果日報》開辦之前，創辦人「肥佬黎」黎智英就喺呢度宴請全行老總高層，公布其創報大業。估唔到時隔廿幾年，唔止報業經歷幾番新，連呢間酒家都經歷唔少轉變，如今更已成為歷史，喺上月底約滿結業，聽講個舖將會轉租俾另一間酒樓。至於海都嘅員工，將會安排去集團旗下位於中信大廈嘅東海薈返工。
講番海都嘅身世，原為已故廚神鍾錦創辦嘅東海‧海都旗下，走高檔路線，昔日有名人飯堂之譽，威水史當然一籮籮，例如1994年被法國《國際先驅論壇報》評為全球第4最佳食肆，曾先後接待過包括：中國前總理 朱鎔基 及日本首相 小泉純一郎 等多國元首級貴賓。後來鍾錦過身，生意就交由佢嘅徒弟楊克鳴等人打理，時移世易，約4年前賣俾舖王「波叔」鄧成波，交由佢嘅兒子打理。
朱鎔基
小泉純一郎