我非常之喜歡睇喜劇，甚至滿有歧視/冒犯的內容，我更會笑得開懷。因為我常常都覺得，越接受到幽默/冒犯的世界，越有機會出現創意。邏輯上雖然有點站不住腳，但某程度上，創意總是由錯誤中發現的。
十幾年前我看英國的《Little Britain》，歧視女人/少數族裔/同性戀……全部都是地獄Gag，睇完一笑就一齊落地獄，然而《Little Britain》最中一個創作人Matt Lucas就是公開的同性戀者，你還有甚麼好說？如果只有同性戀者可以取笑同性戀者，又倒過來，是不是對非同性戀者的逆向歧視(反諷來的，我就是覺得這樣很黐線)？
我以為美國是地球上最開明的地方，有最瘋狂的總統(沒指明是哪個，或者幾多個)，有最瘋狂的金融世界，有最瘋狂的內容創作……自然有最廣闊的胸襟。有冇看過美國Hip Hop的MC Battle？兩個人即場互相跟節奏Rap去奚落對手，看看誰Rap得夠盡夠幽默為之贏。內容90％牽涉到「我和你媽有路」、「你是狗屎」、「你女友是妓女」、「你下體好細」之類，Rap完仲攬頭攬頸冇乜嘢，真係美國文化的一部分體現。
又點知，前幾日奧斯卡，將會史密夫(Will Smith)竟然因為基斯石頭(Chris Rock)笑他老婆而上台出手打人，平權左膠立即飛撲出來，話Will係真男人，老婆唔笑得。人家開口笑你或者你老婆，你可以大聲講粗口(佢已經有)，你可以拉隊走人，你可以拒絕拎獎以示不滿，你甚至可以善用言論自由呼籲大家斷其米路，你叻嘅更可以笑返佢轉頭，就係唔可以打人囉。假若佢講嘅係Bad Jokes，冇人喜歡，自然會被大眾唾棄，何需動粗。咁如果你話Will Smith打得人，亦預咗俾人拉去坐監，做得真男人就不如承擔埋真男人責任，咁我又尊重返佢些少。
喂！又上台拎獎，又講大愛保護家人，但又唔保護美國Comedian(講明美國，其他未開發國家地區另計)冒犯人的自由，神又係佢，鬼又係佢，虛偽到爆。我就支持Chris Rock多啲，嘴係賤，你公開打佢，冇嬲返轉頭，接受自己有冒犯人的風險，做得出兼受埋，真美國男人也。 《黑紙》《100毛》
《毛記電視》共同創辦人