今個巴黎couture week，看得我大呼過癮的騷，應是John Galliano(老莊)的Margiela了。好在這個系列好評如潮，犀利的設計還是有知音人的，都叫做有番些少安慰。
撰文：Carman Chan
才不會錦衣夜行
某程度上我都係statement piece支持者，因為窮，因此若果寧願捱餓(以前細個就會)，都要一擲萬金買designer label的話，首先一定係好愛個牌子/設計師，其次係一定唔會錦衣夜行買低調款式，用足兩次一定，係因為最怕著咗都冇人認出，好唔抵嘛！老莊呢批罵治高訂，用了反光鐳射物料，心諗再有冇誇啲呀？日光日白著出街隨時燒著，單是這份誇啦啦已經成功收買我，買不買得起是後話。
Gimmick背後
18春夏玲姐男裝有高橋真琴「大眼的dot」少女漫畫print，一出已叫我嘩嘩連聲，估唔到Galliano一樣的辣。今勻不但有gimmick，gimmick背後仲有個好convincing的backstory，服到我五體投地。老莊話佢自從出山再為品牌効力，時裝世界已變，都係嗰句「社交媒體惹的禍」，以前看騷的人專注睇衫，現在專注睇芒，最緊要影到，啲衫到底係點樣的，post咗先算。是以這批反光物料高訂系列，專為Instagram而設，一有閃燈就會呈現鐳射幻彩效果，正常燈光下就像防水風褸物料，「freezing the glamour of the accidental, the magical moment」，Galliano稱之為邁進「快速穿衣(dressing in haste)」的另一個新階段。
靜默讓設計發聲
我又真係信這是老莊肺腑之言。一個老牌時裝巨匠經歷過大上大落，吃了教訓，韜光養晦，不再跟從主流拍子起舞，默默做好設計(態度是，衣服可是擲地有聲)，17春夏那件人面輕紗大褸經已叫人驚豔，今季交出他對現今世代入微的觀察，再加上獨到演繹，充分反映時代精神，比起他以前在Dior一味的glam及lavishing，今日的John Galliano有番早期的顛覆反叛，跟罵治的DNA已經水乳交融。自從罵治本尊離開後已經冇幫襯，為了支持老莊，應該添番些少香油了吧？都係嗰句，買不買得起是後話。