繼航空公司總裁辭職、工會主席被炒，爆發離職潮，同事之間相互猜忌的情況日漸嚴重，甚至篤灰。航空界白色恐怖不曾緩解。
之前大致講過，每程機的乘務員完成工作後，圍埋乜都傾一餐，遇著長途機，甚至會由幼稚園講到結婚生仔。但最近的返工氣氛開始無咁easy going，一言不合就有可能被起底，而現在的篤灰文化更是恐怖至極，立場唔同的兩方互篤，講過的說話被cap圖擺上網遭公審，連私人社交媒體都可以成為被正式解僱的原因，所以現在機艙也瀰漫緊張氣氛。當篤灰成為文化，唔好淨係話返大陸恐怖，連返工都提心吊膽。
話說有次接到個即日來回的印尼更，計埋事前準備差唔多要十幾個鐘，所以做完service好快就可以坐低唞唞。一坐底，傾偈的話題自然避唔開當下時勢。
「你咩立場？」個乘務長單刀直入，我諗住搞清楚費事日子難過，就同佢遊花園，結果我哋耍了大半個鐘「太極」，先發現立場唔同。但班機時間真係太長，我哋最後都忍唔住開始理性討論。十幾個鐘之後，雖然某些觀點仍無法說服對方，但和而不同不正是言論自由的可貴之處嗎？一言不合就篤灰真係可以解決問題嗎？
引用內地律師陳秋實的一句話作結：「只跟志趣相投的人交流，會讓我們陷入訊息繭房。作為言論自由的捍衛者，自由派必須努力理解左翼，並捍衛他們表達的權利。即使他們無法容忍不同的聲音。」
肥、毒、宅的空中服務員。