Ray日前上社交網站，忽然見到總編神探蒙探長話回歸香港，再戰江湖，立即約佢出來吹吹水。蒙探長何許人也，就係逢周五於am730有連載小說《總編神探》的作者蒙漢明，佢係新聞界傳奇人物，在此行30年來遊走於黑白兩道攞料刮新聞，係調查狗仔隊鼻祖，前輩近年北上發展，在北京生活接近10年，主力涉足文化、娛樂、電影等行業。
前輩蒙大哥同Ray講，今年已啟動影視項目，即籌備將總編神探拍成網劇，今時今日拍網劇投資都唔細，大陸市場夠大，算係食大茶飯。記得佢於去年am730訪問中提過，心目中最佳探長人選屬意性格演員林家棟，唔知而家想法有冇改變，因始終係商業秘密。不過Ray覺得，故事中的總編神探有型兼聰明，仲識得玩水晶，演員要有人氣，又要有演技，唔係個個都carry到，仲要計下成本，真係要認真諗下。唔知劉德華、吳彥祖、彭于晏、陳小春，鄭伊健、黃秋生呢D型男，或者大台一眾小生啱唔啱心水呢？