這天Y小姐打電話來自飛女和我訴苦：「唔該下次我同你哋講『我會接個美容客』時，你哋記得伸隻手出嚟摑醒我！」是咁的……有一位曾經跟Y小姐鬧翻過的PR(暫稱她為M)致電給她，「Hello，Y小姐，我哋上次都合作得好開心喎(Y小姐：傻的嗎？上次是互鬧收場喎……)，我轉咗新公司，是一個韓國配方的美容產品，又有自己的美容院和醫生，今次再找你幫手統籌拍宣傳照和網絡廣告片……今次啲嘢簡單好多，唔會好似以前咁煩(Y小姐：仲以為佢扮飲咗孟婆湯唔記得前塵往事添！)，就幫幫我手啦！」
Y小姐心軟，覺得M很有誠意，於是就跟她再次合作，誰不知一簽了約就再一次「原形畢露」─本來說好了以拍硬照為主，再加拍兩條片，結果要加到拍四條片，而拍照的數量又不可以減少；而最令人頭痛的，是因為要遷就代言藝人和模特兒的檔期，要由原本拍攝兩個工作天，變成只得一個工作天，即工作雙倍時間減半！飛女問：「咁有冇加返酬金先？」Y小姐：「你估呢？」收到！終於一大輪混戰，拍攝總算完成，但原來惡夢還沒停止。Y小姐說一早就向M解釋了先剪輯好rough cut「毛片」讓客戶看看零碎片段如何組合成一條條長片，揀好了需要的片段方會做後記製作慢慢「細執」。「沒有人會把全部拍下來的片段fine tune再畀客人揀，否則tune半年都未做好！」誰不知M一看到毛片就大喚「唔靚喎，我哋做美容嘅唔係要呢啲囉，未到水準！」
一輪鬧戰又即將展開……我和飛女都覺得所謂「有仔教落孫」，千萬不要接這種客戶！