Ray以前聽聞，政府運輸部門高官是不會亂過馬路的，以免招人話柄，而原來環境局長黃錦星亦以身作則，家中客廳沒有冷氣機，房間規矩夜晚達攝氏28度或以上，即所謂「熱夜」才可以開冷氣，果然唔做「大嘥鬼」，一個佢引以為傲的卡通人物。
黃錦星接受馬會刊物《駿步人生》最新一期訪問，亦講到眼闊肚窄的大嘥鬼的由來，話說佢於5年前當上環境局長，第一個主禮的活動就是「惜食堂」在柴灣開設的第一個廚房，得到啟發，諗番70年代政府推行清潔運動，曾設計出「垃圾蟲」，非常成功，咁不如做一個現代版，推動惜食，基於諺語「眼闊肚窄」，便設計出大嘥鬼呢個形象，仲幫手宣傳其他環保項目。佢又話，到一兩年前，政府推動全民節能運動，於是叫大嘥鬼兼職，加個電掣係個肚裡面，化名「慳神」。
黃錦星有行山習慣，維持至今，訪問中更提醒大家，自己垃圾自己帶走，少用即棄物品，消費大自然，還要愛惜它。