首間屈臣氏購物概念店CKC18進駐長江中心地庫，昨日於長和主席李澤鉅親自主禮下開幕。Ray昨日去睇過，印象最深係好多科技元素，例如有個無人收銀區，只要將成個購物籃放於指定位置，大概1秒左右就掃描完，揀埋俾錢方法就得。
CKC18設有4個區，Ray感覺最新鮮的美妝及健康區(WatsonsLab)。美妝區有兩個位置用咗RFID技術，可以將產品放於查詢枱，屏幕就會顯示包括牌子、用途容量等詳情，非常方便，而用咗AR技術嘅「化妝機」，只要行埋去校啱角度影張相，跟住好似貼紙相咁揀想要嘅效果，搞掂之後會俾個QR Code你，掃完就可以攞番張相，同埋顯示用咩產品可以化番個妝出嚟。至於其餘仲有美食區(food le parc)、美酒區(Bar 0001 by Watson’s Wine)、電玩潮流區(TechLife by FORTRESS)，兩萬幾呎地方有排逛。
李主席心情靚，同記者傾咗好耐，仲話平日好少去分店開幕，但CKC18就在總部樓下，唔可以唔落嚟，而家開咗CKC18，最主要係同事好開心，終於揾到地方食嘢，放工又可以落嚟飲兩杯，至於大家最關心嘅樓市，佢就覺得因為供應少都仲睇好嘅。講番屈臣氏業務，佢話屈臣氏已在全球開設1.43萬間店舖，今年會再開1,300間，平均每7小時就有一新店開設，創近期紀錄。