我一直都以為detox係食得有幾清得幾清，甚至只係飲果汁排毒，無啖好食。但啱啱個weekend我去咗泰國華欣Chiva-Som養生度假村過咗個long weekend，就完全改變咗我對detox嘅睇法。雖然只係三日兩夜，有啲唔係好夠喉。不過，呢幾日嘅all you can spa同all you can eat已經夠我好好relax。
Chiva-Som開宗明義係detox度假村，身心都要detox，最重要係 “Digital Detox”，嚴禁使用電子產品，連影相打卡都唔得。放低部電話3日，個人又好似終於慢到落嚟，唔再咁緊張。
而食物方面，所有菜式也由營養師同泰籍大廚計好晒卡路里攝取量，仲印埋落menu，等你可以計住食。大廚仲話：「落少啲油，將油分嘅卡路里撥埋入食物，咁咪可以食返多少少分量囉！」兩間餐廳同樣係all you can eat，話晒都luxury resort，當然唔會玩buffet啦。所有菜式都係即叫即煮，新鮮熱辣咁上枱。有肉有海鮮，唔係一味得素菜。泰式餐廳Taste of Siam有齊香港人最愛嘅泰菜，青木瓜沙律、冬蔭公、青咖哩紅咖喱、串燒，甚至芒果糯米飯都有，全部都係輕盈版，分量少且調味輕手，大家可以試多幾款之餘又唔怕飽到上心口兼食到內疚啦！華欣Chiva-Som養生度假村 www.chivasom.com (房價已包括一日三餐及spa)