GOOGLE、Facebook的辦公室出名設計靚、福利好，令一般打工仔羨慕；近日Facebook香港辦公室，由原先鰂魚涌港島東中心60樓，遷至一街之隔的太古坊一座，佔地4層、逾6萬平方呎。新office昨日開幕禮，政務司長張建宗都俾面出席，Ray亦趁機去參觀下。辦公室設計沿用開放式同落地玻璃嘅理念，可遠眺維港海景。辦公室繼續保留本土文化，多個會議室以街頭小食、電影甚至口語命名，如「打邊爐」、「花樣年華」及「煲電話粥」等。牆壁由4位本地藝術家創作，包括摩登城市主題等；又將一個角落布置成「城市夜景」，以霓虹燈為設計，讓員工可以打卡。配合數碼發展，辦公室增設配備隔音裝置的「Facebook Live Studio」，可進行直播及錄影，方便員工與不同社群聯繫。
香港人工時長，最重視應該是公司pantry或canteen有咩食，而Facebook設置的食堂「UPSTAIRS CANTEEN」，則搬咗大排檔及流動小販卡車嘅食物入去，全天候提供各類零食、熱餐，以及冷熱飲品，更有廚師駐場即叫即炒、亦有熱辣辣點心。返工，總會有腦閉塞情況，小休、或玩樂一下，反有利創意提升，辦公室設有多個休憩角落，提供梳化及按摩椅，亦有遊戲室，員工可打下桌球、玩玩籃球機等，放鬆心情。
