京都之旅【其の壱】鰻魚中伏記 日本一の鰻「京極かねよ」
三年冇去日本，今年終於可以再出發。第一程首選並不是東京大阪而係京都，目的只係想閒逛，到鴨川走走、踩下單車，順道探下多年冇見的食店老闆。搜尋美食當然係重中之中，千挑萬選之下喺鰻魚呢個重要環節，選中了有「日本一の鰻」稱號嘅京極かねよ。
喺新京極商店街近六角通位置嘅京極かねよ極具人氣，無論係台灣blogger或者hkigers都幾乎係讚多過彈：「魚肉吃起來略帶備長炭烤過後的炭香」、「大大塊玉子底下鰻魚香湧出嚟」，連森美亦曾經喺旅遊節目介紹過，所以我決定將佢放入必吃清單。
殊不知：我中伏了。
京極かねよ 百年難得一見地難食
京極かねよ嘅炭燒鰻魚有近百年歷史，原來亦係百年難得一見地難食！Lunch hour入座點單後，不到五分鐘きも焼き(燒鰻魚肝，1,100円)便送來了，咁快？不消一會，又有鰻白焼き(特)(鰻魚白燒，3,900円)緊接上枱，又咁快？極速手機食先立即起筷，OMG！燒鰻魚肝唔熱唔香！鰻魚肝應有嘅甘香欠奉，只有一個苦字。鰻魚白燒則甚有隔夜feel，唔熱唔香唔油潤，冇味又死實嘅魚肉內炭香味亦唔多覺。呢一刻已可肯定全部都係整定放晒喺度，上枱前亦完全冇翻熱，離晒譜。う巻き(燒鰻魚蛋捲，1,100円)標晒煙熱辣辣，亦係呢碟嘢唯一嘅優點。
名物出場：きんし丼(特)(玉子燒鰻魚飯，4,500円)，玉子燒唔夠熱又鞋烚烚，鞋底級數直逼Dr Martens，底下嗰兩件鰻魚亦秉承店內傳統，唔熱唔香唔油潤，食咗一半完全吞唔落，為示不滿我食剩晒所有嘢。人數3名樣埋單一萬八千円，真係嬲到爆粗，所以我決定救得一個得一個：奉勸大家嚟食前要諗清楚，畢竟去旅行quota有限，食一餐少一餐！同時亦反影咗港諺「日本是但一間都好食」唔係實情，如果說你講得出呢句，咁一係你好彩、一係你無知；再唔係，就係你去得日本唔夠多。
雖然咁講得罪好多人，但事實的確係咁：IG害人，影響一生。共勉之。
日本一の鰻「京極かねよ」
京都府京都市中京区松ケ枝町456
kyogokukaneyo.co.jp
