又到年尾時候，正想好不好跟美劇專欄一樣做個年終結算，看看今年時裝界有甚麼事情值得記上一筆。
要我數一年下來看過甚麼精彩美劇，可以數到欲罷不能；然而，要我講一件半件時裝好事，除了好幾個大牌子終於「良心發現」，全面禁用皮草以外，諗咗好耐都諗唔出仲有乜美事，反而醜事糗事多籮籮，尤其下半年爭相出醜：D & G教中國人食意粉單嘢唔在講；Burberry寧願一把火燒晒啲過季貨，都唔平賣益你；Samsung中國跟意大利黑幫Supreme Italia聯乘，更是天大笑話……繼續數落去真係同呃稿費無分別。
冇創意扮實驗性，無恥！
勉強要講，今日時裝界只有跟風同懷舊，翻炒以前「食胡」的方程式。有無人統計過，一年下來A牌與B牌甚至C牌交叉聯乘的事件有幾多單？好像不聯乘就完全無talking point，每次見到新一單上場，只有翻白眼，心忖：「又嚟？」，就算自己有份供奉的神枱牌子都要講：Dover Street Market那批聖誕聯乘product就是搶錢之作，Gucci條紅綠band搭上CdG個膠「紙袋」又掠你一筆，新聞稿說得好聽，話係兩大設計師「experiment together」的結晶，真係sorry，恕我看不見任何實驗性可言。
這還不是最扯，新意乾塘到極點，從舊作攞靈感這個理由已說到爛，引不起注意，索性一模一樣照dub出嚟重製一次，還振振有辭說向那個年代致敬。其實我介意的不是remake，反正懷古永遠有市場，但擺明車馬腦袋乾涸，然後用上冠冕堂皇理由去掩飾就好乞人憎，可以厚顏到這個地步，服了。消費者眼睛雪不雪亮我不知道，我只知百貨有百客，總有魚上釣就是了。
我買我Po為找存在感
還有「撈稿」比任何設計都重要，Riccardo Ticsi新官上任，第一件事就是為Burberry轉logo；Hedi Slimane要抹走前朝歷史，IG舊post一個不留，連Celine個é上一撇都忍唔到要搣掉；這下可好，至少以後上二手名牌網，見住有é的Céline來買，更方便。Balenciaga、Fendi的鋪天蓋地更恐怖，遠遠看見已像人肉廣告牌，只見牌子不見人，啱晒鋪上IG炫耀。
這些marketing stunt，跟品牌本身的歷史、以往經典設計有何關係？沒關係，因為在社交網絡的年代，我們只存在電話中那幾吋的小屏幕，以二維方式展示我們的生活，我們不像富二代，可以有名車private jet周圍去，唯一可以晒的，就是名牌logo，花一萬幾千買到上等人的幻覺，並為此而感覺良好，這就是今日的時尚。
