八千代伝黑麴 曾獲2013年鹿兒島縣本格燒酎鑑評會的「杜氏代表賞」，以黑麴釀造，酒味最濃，入口頗順滑，帶點番薯甘香，有餘韻，淨飲一流，夠晒Man。$380/支
八千代伝白麴 以白麴釀造，入口芳香，較黑麴平易近人一點，聞香亦較Light，整體似黑麴減辣版，加熱水或加冰飲就最啱OL。$380/支
黃色之椿 春季限定，採用番薯王安納芋(種子島產)釀製，一年一造，物以罕為貴之餘味道較其他來得富豐香甜。$580/支
千之飛躍 名字特別，釀造材料包括麥、白麴、黑麴及黄麴等，充滿小麥香味。$370/支
燒酎佐酒肉食三點
燒酎佐食海鮮三點
青森縣產 津輕豚肉鍋
神屋流博多道場─尖沙咀店
杉內馨 Kei San
八千代伝燒酎
身為一個酒鬼，每逢食日本嘢，飲日本酒(清酒)係定律嚟，因為易入口，喝多了也不自覺，宿醉頭痛亦隨之而來；不過自從上月中認識了香港首位日本燒酎品酒師杉內馨(Kei San)，呢個定律要改寫。
「喺居酒屋，日本人而家好興飲燒酎(音：就)，因為佢嘅原材料係番薯，屬於無糖分嘅蒸餾酒，所以零糖分兼且零卡路里，就算糖尿病人都可以飲用，不過佢酒精度較清酒高。」Kei San邊喝邊說。我先嘗了一口八千代伝黑麴，酒精味道沒有想像般濃烈，反而番薯的甜香在舌頭慢慢滲出來。「燒酎飲法亦變化多端，好似士兵你呢個酒鬼可以淨飲啦，其實佢可以加冰、加熱水、或者做Cocktail都得，但清酒就唔得，加上飲多都唔會宿醉頭痛，所以燒酎好受日本人歡迎。」Kei San補充說。
位於尖沙咀的博多道場最近就同八千代伝來個Crossover，為一眾燒酎初心者提供Pairing Set(自選三款燒酎，每杯約60ml)
燒酎佐酒肉食三點 $148
煙肉蝦丸─炸物，香口+微辣=要飲多兩杯黑麴。
鹽豚─鹽醃，慢煮+津輕豚=嗒兩啖千代吉。
博多醋味滑牛腸─內臟，脂肪+煙韌=配白麴最襯。
燒酎佐食海鮮三點 $148
元貝腐皮包─鮮味，元貝+秋葵=淺嘗白麴。
魷魚鹽辛芝士─鹹香，魷魚+芝士=足以KO半支黑麴。
白飯魚苗青椒仔─魚香，青椒+魚乾=千之飛躍半杯。
青森縣產津輕豚肉鍋 $248
津輕豚肉脂肪位夠多，用中小火輕輕灼熟最佳，入口肥而不膩，肉質軟滑甜美，一口酒一口肉，妙絕。
神屋流博多道場─尖沙咀店
地址：尖沙咀金馬倫道5號太興廣場3樓
電話：2312 6922
饞咀，成日想食好嘢，卻一星期食足五日外賣飯盒嘅am730死肥仔創作總監。
杉內馨 Kei San
香港首位日本燒酎品酒師
原籍日本北海道的Kei San，居港多年，廣東話「lak lak」聲，非常親切，對日本食材瞭如指掌，尤其對日本酒甚有研究，最近仲取得日本FBO及SSI 頒發「燒酎唎酒師」及「燒酎品質鑑定士」資格，wine sommelier一街都係，燒酎sommelier暫時只此一家，跟佢飲，冇死錯人。
八千代伝燒酎
1928年由第一代創辦人八木榮吉建立「八千代釀造元」，位於鹿兒島垂水市的猿城溪谷深山(日本國家保護林區)，環境優良，雖知道肥沃的土壤、水源，是酒廠的命根，所以八千代伝用自家種植的番薯來釀酒，風味獨特味道醇厚。而年僅27歲二代目杜氏八木大次郎(圖)釀製的八千代伝(黑)，榮獲2013年鹿兒島縣燒酎鑑評會的「杜氏代表賞」，年紀輕輕已令全國注目，すごい！