預期標普500指數至少要跌15%至20%先會喘定。 (資料圖片)
上星期，幾年沒見嘅朋友聯絡我，問及股市表現。字裡行間感覺到唔妥，約了他第二日出來飲杯咖啡。「買幾隻港股輸咗七成，轉買隻美股AMC，唔夠一個月再輸六成，真係黑仔！」我惟有簡單分享及勸導︰美債拆息升勢未停，加息潮未完，我估標普500指數至少要跌多15%甚至20%先喘定。不如考慮止蝕離埸？
原來，他貪方便開了個股票孖展戶口，老婆起初反對，但他發誓唔會借錢投資。但當股票倉位愈輸愈多，他一心博反彈追數，已動用一倍槓桿再「撈貨」。結果，手上港股及美股皆跌愈半，戶口數字已見六位數字負數。他每月出糧，都要存錢入去股票股戶，去抵銷巨額利息及虧損，防止被證券公司斬倉。財務壓力，亦令他對家庭仔女，及事業失去應有專注。
事態危急，我惟有再嚴詞訓誡︰你現在唔肯止蝕離埸，承受損失的傷痛實在其次，你根本係擔心老婆知道實情後嘅結果，這表示你所作既決定已非理性行先。況且，環球股市大機會向下走，你的帳面損失隨時加倍，到你再無辦法承擔而需要在最差的市況斷臂，無論財政、家庭、事業，都會萬劫不復。
過了一個星期，這位朋友似乎並無聽取我的勸告。上述乃真人真事，例子也並非冰山一角，望有緣人能及早回頭。