網上圖片
大概6、7年前，跟一位內地一線發展商銷售部頭頭碰面，當時大陸樓市已經好火，佢劈頭問我會否考慮在大陸置業，Loser答覆係長線都睇好內地經濟，但當時樓價標升驚人，隨時有機會出現調整，暫時都係觀望。點知佢回應一句：「樓價係唔會跌」。
對於經歷過97之苦嘅港人，對佢咁講自然有點嗤之以鼻，之後點呢？結果到今天，佢啱我錯，大陸樓價幾乎未出現深度調整，樓價一直上揚。經過呢幾年，大陸人更加堅信「樓價係唔會跌」。
高價搶地的思維
這又難怪，大陸樓價在十多年前起步，期間大漲小回，加上大陸人並不理性，買咗新樓嘅，一旦見樓價稍微調整，隨時作出激烈行動，衝擊破壞銷售處時有發生，政府又要講和諧社會，發展商推新單位時，寧可推出優惠補貼，都唔會立亂減價，久而久之，樓價只上唔跌嘅觀念已經植根大陸人腦海。
原來人嘅思維係咁，當一件事情重複發生，久而久之，你慢慢習以為常，認為係理所當然，以前類似嘅情況係會持續發生，你不會有任何懷疑。
就係呢種思維，大佬發展商夠膽喺香港以癲價搶地，佢哋咁諗，即使地價買貴5成，但香港土地契約規限，投得的土地通常要在6年內發展完成，以過去經驗，樓價每年升1成好平常，保守估計，6年就是樓價升6成，已可抵銷今天高價買地嘅成本兼有利潤，咁又點會輸。
認知偏差導致毁滅性破壞
情況一如97前港人買樓，大家會咁諗，每年人工都上升，即使今日高價買樓，開頭供款係辛苦，愈供下去，人工逐年加，層樓價值又上升，供樓根本唔係問題。點知97金融風暴，經濟急轉直下，人工非但冇加，仲冇咗雙糧花紅，慘啲嘅要減薪，惡劣嘅甚至冇咗份工，啲樓價又持續下跌，孭住層樓慘到要燒炭。
大陸佬只見樓價升，未見樓價跌，從來未見過樓價崩塌嘅恐怖，所以能夠講出「樓價係唔會跌」嘅豪情壯語。這種認知偏差愈發展下去愈根深蒂固，直至出現改變，就如09年之前冇人相信匯豐股價可以跌至33元，97前冇人相信樓價會勁插7成，90年代前嘅日本人，想也沒想到樓市跌足30年，大陸幾時或會不會出現呢個情況loser並唔知道，只知道一旦出現，打擊將會是毁滅性。