在投資領域裡，無論是買樓買股票，都是寧買當頭起，莫買當頭跌。 (資料圖片)
任何人都會認為，在投資領域裡，無論是買樓或買股票，都是寧買當頭起，莫買當頭跌。其實，買樓與買股票是有有所不同，在樓市上升時，業主可能會反價，甚至唔賣，就算可以買到，都未必是心目中喜歡的單位。所以，在樓市上升時買樓，隨時比業主激到彈起，反之在樓市下跌時買樓，樂趣無窮。
物業投資者有一個通病，就是鍾意鋤價，在樓市上升時鋤價，不但失去一次又一次機會，仲會俾其他人話如果唔貪心鋤價，早就可以買到。當樓市下跌，投資者是可以肆意鋤價，業主明白，在樓市下跌時是沒有話語權，行內有一句話，Any offer is an offer。在樓市下跌，任何還價都是合理還價，業主是可以不接受，萬一業主接受，買家可能冷手執個熱煎堆。近日有不少蝕讓樓盤售出，買家都是以這個心態買樓，總之，樓價唔平，質素不佳的單位根本唔會考慮。
有人話，萬一業主唔肯賣，買家可能會錯失良機。在樓市上升時還可以這樣說，當樓市下跌，買家鋤價，的確有可能買唔到，但樓市如果繼續下跌，可以反笑業主有錢都唔識得收，現在要繼續減價才可以賣走。所以，千祈唔好以為在樓市下跌時唔應該買樓，莫買當頭跌並不一定是對的，最緊要是睇成交價與物業質素。
作者為紀惠集團副主席及行政總裁