超級梁粉陳啟宗最近又開火罵人，今次矛頭係中國首富王健林，佢喺中期年報話大陸有啲發展商項目唔掂，臨急就章，專起劣質商場，唔似恒隆啲商場千錘百煉，個個係四五星級。
雖然老陳冇話明係邊個，但有媒體就話佢指嘅係王健林間大連萬達，事關萬達喺中國擁有最多商場，項目落成速度又超快，陳啟宗好明顯係衝住王健林嚟批評。
過去十幾年，陳啟宗對大陸推崇庇致，乜都大陸好大陸掂，將幾百億資金全掟入內地起商場。初時適逢中國入世貿，經濟起飛，恒隆喺上海嗰兩個商場年年租金大升，證券界更加大吹特吹，恒隆股價連連上升，陳啟宗風騒到不得了，成日話人短視唔識返大陸發展。
錯失香港樓市黃金十年
好喇，十幾年過去，到今日只起到八個商場，除咗上海兩個商場仲係穩定外，今年中期業績見到，八個商場中有六個出租率下跌，無鍚出租率只係得7成幾，大連更加得6成，租金方面，瀋陽同無鍚更急跌兩成。
呢啲商場每個投資動輒七到八十億，除上海外，唔少每年都係收緊幾億租金，唔好忘記商場吓吓百幾兩百萬呎，管理同維修你話幾喺嘢，扣埋呢啲費用，有幾多錢落袋，我真係好懷疑，特別今日內地商場林立，競爭激烈到爆，未來恒隆啲商場能唔能夠殺出重圍，真係唔敢講。
反而若陳啟宗當初將呢筆錢投入香港地產市場，買地發展，肯定贏到開巷；點知佢因為低價時執咗機鐵九龍站塊地，起咗「君臨天下」後就目空一切，以為自己眼光奇準，成日話恒隆喺別人買貴地時唔會郁手，樓市見底時時先入市。點知呢次佢等吓等吓，過咗十幾年香港樓市都未見底，反之仲升爆，可以講佢平白錯失香港樓市嘅黃金十年。
眼光仲停留做收租佬
其實佢當初若將啲資金放喺大陸市場起住宅樓，唔係獨沽一味起商場，以呢十幾年大陸樓市井噴式上升，亦唔會執輸過香港樓市幾多。不過老陳一方面睇唔起啲大陸發展商，認為佢哋只識起啲標準化嘅樓盤，另外可外佢又唔多識點喺大陸市場起住宅，於是又錯失埋大陸樓市爆升呢一個千載時機。
今日老陳反而批評王健林，講真，依家王健林都話唔擁有商場，要以「輕資產」模式發展，即只負責設計、建設、招商同營運，物業反而讓別人投資，自己再按商場租金比例分成。另外，王健林更加要做「大數據」，以佢內地咁多商場及會員，可收集顧客資料、喜好及購物模式，利用呢啲數據進一步拓展其它業務。反之你陳啟宗仲講緊起乜乜五星級商場，點靚點正，層次同視嘢仲停留做收租佬，唔怪得人哋係首富，恒隆今日連新世界發展（0017）個市值都比不上。
最終王健林成功定陳啟宗失敗暫時未知，但大家唔知記唔記得十幾年前美國英隆（Enron）單世紀做數嘅醜聞？當年英隆其中一位獨董，咪就係陳啟宗囉，咁你就知佢嘅眼光去到邊個水平喇！