喺財金界，恒隆地產（0101）主席陳啟宗都可算其中一位至牙擦人物，佢經常語不驚人死不休，吋人窒人唔使本，早幾日又公開大發議論，批評話最唔信兩類人，一就係投資銀行，其二就係記者，仲話記者還好，因為比較誠實，言下之意即投行班人就係大話精？
Loser有個分析員老友，聽到陳啟宗咁目中無人都好唔忿氣，佢話老陳成日講到自己咁英明神武、高瞻遠觸，查實咪又係自吹自擂。老友話陳啟宗因為喺九七樓市冧咗之後低價入咗幾個地產項目，後尾起好樓後碰一巧樓市復蘇，於是成日話自己眼光獨到，乜嘢人地高價搶地時恒隆唔會咁盲目，市差時恒降又可以摸底買入，總之形容到自己好有視野，永遠捕捉到市場高低。
十年磨唔出一個盤
實際情況係點，老友話沙士之後嘅十二年，樓市由谷底回升，樓價迭創新高，恒隆究竟買過邊幅地？發展過乜嘢樓？陳啟宗淨識自我吹噓話唔會高價搶地，點知個樓市升完又升，恒隆淨喺度賣啲君臨天下貨尾，十年嚟都冇個似樣新項目，平白錯失咗樓市黃金十年。
佢話陳啟宗生性孤寒，好似銅鑼灣崇光百貨幢大樓，二千年初日本仔撤出香港，將成個項目放盤，恒隆原本好有機會買到，但最後冇大劉與彤叔咁濶綽，結果大肥肉到口都跌咗，大家睇睇今日崇光幢大樓幾咁旺，價值高出當年兩三倍。
衰姑寒崇光失諸交臂
至於陳啟宗經常掛喺嘴邊，話喺大陸投資咗唔少核心商場，好驕咁話自己早著先鞭，有眼光走進內地大興土木。分析員老友就話佢淨識起商場，唔夠膽起住宅。你知商場收租好細水長流，除咗當年上海恒隆廣場適逢其會租金年年增長外，啲二線城市起首租金收入唔多，要收番成本，冇嗰十年八年都唔使旨意。好衰唔衰，好多地方近年商場林立，跟恒隆出現強烈競爭，瀋陽就係一個好例子，恒隆真係要賺大錢，仲要有排等。倘若佢敢起住宅，早已經賺大錢。
仲有，陳啟宗經常炫耀自己企業透明度高，企業管治誇喇喇，老友就話當年美國著名上市公司英隆做假數醜聞，搞到掀然大波，累死唔少股民，當年英隆其中一位獨立非執行董事，咪係今日嘅陳啟宗囉。