香港樓價高已係不爭事實，至於點解咁高？無他，求過於供啫，點樣解決？不外乎壓需求，增供應，壓需求嘅招數幾已盡出，增供應係唯一出路，但點樣增加供應？
前幾天去聽一個增加土地研討會，講者有前規劃署長、前立法會議員、還有乜乜團體主席或代表，佢哋所謂建議，來來去去都係嗰幾點，就係叫政府填海、轉農地為住宅、開發郊野公園、公私合營、增加市區地積比率、活化工廈、加快建屋審批程序等等。
除咗增加市區地積比率外，基本上我都同意佢哋建議，但所謂靈丹妙藥，你估政府冇諗過度過咩，班講者所謂真知灼見，其實你同我都諗到，問題係執唔執行到嘛！
講真，班講者應該探討嘅問題，唔係教政府應該點做，而係問點解政府冇咁做，或者應該係話點解政府做唔到；作為民間智囊嘅佢哋，關鍵係點幫政府或提供建議去針對核心問題。
點解政府做唔到，其實都唔係好難理解，兩個字就足以講清楚，係乜，咪就係「政治」。市場上有咁多有心人去做事阻難政府，填海話破壞海港、探討開發郊野公園話吋土不讓、轉農地又話破壞綠化、搬啲新界租霸走又話強搶民地、公私合營又話官商勾結，喺咁環境下，你話政府點郁？
土地資源就係咁多，呢樣話唔得，嗰樣話唔得，當然說穿了是有心人故意要阻撓，以達到某啲政治目的。第二樣唔講，好多幅政府計劃推出招標的土地，原已具備發展條件，竟然被人無端端走去司法覆核，令到建屋發展受到嚴重拖延，居心叵測。
所以話，供應匱乏又豈是土地不足問題，根源係「政治」問題，要增加土地，非不為也，實不能也。