樓價掛鈎債券與樓市走勢相關。(資料圖片)
跟欄友徐家健教授閒談下，他提出樓價掛鈎債券的概念。我覺得大有可為，所以在友欄簡述了基本概念了，希望林鄭和特區的技術官僚予以考慮。這個概念比樓市期貨更合適，因為香港樓市的衍生工具很難證券化和市場化，由政府去做，師出有名，而且政府又有水，新班子又要「橋」。再參考網友意見，我覺得有些盲點可以釐清一下。
我覺得至少有2點公共行政概念，要講清楚。第一，就係專欄只能提供原則性討論，至於點執行，那要由技術官僚提交方案。例如可能有人覺得要限年齡，但限30歲定35歲，那就到時再傾，太trivial了。
第二，就係政策要考慮執行機會率，以及遷就「最大公因數」，平衡最多及最大的利益，即係睇成本效益。當然，實有人會話打爆樓價才是最好的。樓價大跌，我也會額手稱慶，但大家也就不用傾了。因為樓價一爆，好多中產要跳樓。
樓價掛鈎債券概念上跟iBond(通脹掛鈎債券)相似，只是後者以通脹掛鈎，前者以樓價掛鈎。第一，常見的考慮是受惠不夠多。那要看怎麼派，大家潛意識會把樓價掛鈎債券跟iBond睇齊。好似iBond咁，每人都係中幾手，賺幾千元，的確到喉唔到肺。其實認購人的資格可以有限制啫，例如「無樓」、參考「入息」等，如果想針對年輕人，不妨加入年齡限制。好像銀髮債券也只限若干歲數的老人認購，為甚麼不可有以年輕人為目標的債券？分餅仔的人數少了，自然每人都可以多分一點。而且，上面所有資料，都是政府內部database有齊，唔會做唔到的。
至於認購資格如何，派幾多，coupon rate點釐定等，那是具體方案的討論，只要大家原則上同意可以咁搞，那就ok了。
何況，我已強調過，林鄭是「福利主義者」性格，新政府上場也要良策做好民生，庫房是長期水浸，只是大家無好理由去派錢而已。樓價掛鈎債券的本質，就是派錢。
第二，有朋友會用來私益機構的概念，佢哋會覺得用樓價做債券，必須要政府有若干樓做back up，才能對沖風險。退一步去想，其實政府以高地價去賣地，賣地是政府主要收入來源之一，本質上已間接對沖，因為樓價高，其中一個原因就是地價高，而政府就是高地價的受益機構。樓價掛鈎債券就是讓高地價的收入，派回想上車的年輕人手中。
坦白講，呢個論點到時幫樓價掛鈎債券做lobby，做roadshow仲好sell，因為可以sell「取之於民，還之於民」，反對派無得吵，充其量只能埋怨林鄭派得唔夠多而已。
有朋友也提出用convertible bond的概念搞居屋上車，這只怕要下一步才能搞。先一步一步慢慢來，慢慢sell政府樓價掛鈎債券先，因為政府不是私人機構，官僚要麻煩起上來，真係可以好難頂。