一場嚟到，一定要睇
算不算躺著中鎗？杜曹上任英格蘭領隊不夠兩個月，一場比賽未打就已經被批評「太少入場睇波」。所謂無比較就無傷害，又睇睇日本森監督最近做咗乜，日本J League過去兩個月休季，日本國家隊領隊森保一於1月31日出發，2月17日啟程返日本，撇除坐飛機時間，逗留歐洲約2個星期。14天內森監督睇咗15場歐洲球隊比賽，有時候日本球員未必有落場，不過「一場嚟到」，森保一話佢都會把握機會同球員傾下偈，了解下球員狀況。15場比賽中，只有一場嘅match up雙方都無日本球員，就係第一回合嘅曼城對皇馬，不過森監督咁勤力，當放一日假都好應該啦。
森保一返到日本後同傳媒講，未來會考慮更多此類型嘅留歐觀察，甚至考慮喺歐洲設立據點。其實喺大部分日本國家隊成員留歐嘅情況下，森保一嘅想法真係無可厚非，不過要同時平衡日本J League嘅關注度，對森保一嚟講就係一大挑戰。其實每次公布國家隊名單，日本傳媒第一時間都會睇睇今次日本隊有幾J，即係效力國內聯賽嘅球員有幾多位。喺保持球隊實力嘅同時，要令依然在日本聯賽效力嘅球員覺得自己有入選國家隊嘅機會，咁先可以幫手保持甚至推高J League嘅水平。
咁樣睇森監督份工都有其難處，杜曹知道唔知會有咩感覺呢？或者今個星期曼城對利物浦就會見其真身？