天才最後一擊？
英超帥位短癮，往昔費Sir長鬥雲爺嘅二龍爭珠年代，再難重現。英格蘭現時4個級別計効力一支球隊最長命嘅領隊，前7位仲有5個嚟自英超，但年資排第2長嘅高普同第7位嘅莫耶斯，季尾走人。英超領隊如今喺一間球會平均逗留僅3、4季，反正隊隊收入豐厚，炒主帥成本對比唔高，球會保到命獎金就長賺長有；好似水晶宮以往季尾例腳軟，但年初換上喺英超生涯最「年輕」領隊加士拿，教咗唔夠3個月，隊波脫胎換骨，走勢似倫敦「二哥」。今屆英超隊戰績參差到有啲離奇，幾支強隊踢得差，升班3隊一季玩完，英超今夏換帥又忙。
高普退下，西班牙師徒對決似成英超下一單元嘅激鬥；不過睇返莫耶斯只係61歲，有人話佢教波過氣保守，但攞住上屆歐協聯盟主、教過英格蘭最佳中場迪格蘭賴斯呢份CV，教波風格務實，死球戰術煞食，告別鎚仔前領軍喺英超煞科戰鬥曼城，隊波或者係炮灰，但既然攞住29分嘅森林都今屆都護級成功，莫天才點會搵唔到另一份英超好工。