奧運樂與怒

奧運各有捧場客，港將跟世界比併，跳馬老將石偉雄、19歲嘅「女花」陳諾思及賽艇好手趙顯臻，各有奮鬥故事，即使未能取得獎牌，一樣可以笑住離開巴黎。鍾意睇星嘅更目不暇給，一路睇乒乓球混雙港將「黃杜配」贏波入四強爭牌，同時間又可扭去另一台睇由NBA「大帝」、39歲嘅勒邦占士領軍嘅美國男籃，聯同「咖喱仔」同「KD」，輕易擊倒由NBA常規賽MVP常客祖傑帶領嘅塞爾維亞，有今屆冇下屆。

可怒係足球比賽世界風行，球迷全年不愁寂寞，可惜往往爭議聲最多，跟世界公平競技水平同水準脫軌，愈期望愈失望；早前歐國盃，悶戰連場，普遍強隊包括「三獅」戰術保守，各自為戰。嚟到奧運賽場，先有男足揭幕戰阿根廷鬥摩洛哥亂局，要「空場」埋尾；再有加拿大女足教練團隊玩無人機，刺探新西蘭女足操練軍情，被扣6分仍玩放生，只要「加女」明晚深夜尾場贏最渣嘅新西蘭女足，攞住3分仲有機會入8強出線。足球永遠有爭議，準則不一，奧運好戲連場，睇足球檔次都應該好似歐國盃咁，等四強、決賽先留意最合適。