干地炒得太遲
干地「博炒」成功，軌跡跟前前帥摩連奴兩年前相似，當年季初係威係勢，遇強敵間有佳作；但之後英足盃同歐霸都喺16強出局，聯賽盃決賽前先肯炒摩佬，但當年都要喺決賽受挫曼城。熱刺今屆開局作客英超同歐聯踢得好差，但靠主場威力，叫做頂得住；但年尾世盃後返嚟冇變化，最弊主場輸俾死敵阿仙奴，今屆被「雙殺」面子盡失。之後干地健康出問題，助手頂檔，李察利臣公開插干地免罰，仲可以即刻踢返正選，一片混亂；意大利人先選擇自爆插球會老闆利維無能、球員自私，逼到高層出手。
熱刺近年最大問題係個別大哥級球員留隊太耐，冇心也乏力；幾大台柱，好似隊長門將洛里斯、入波如麻嘅孫興民今屆跌晒watt，攻守早已失據；只怕利物浦同紐卡素，甚至白禮頓季尾冚上嚟，到時熱刺淪落踢歐協聯毫無意義，淨返10場先肯換帥或已太遲。熱刺要復興，搵新門將、老孫接班人同肯放棄今夏踏進「三字頭」仲值1億英鎊嘅哈利卡尼，新波士先可重新出發有發圍機會，干地臨別贈言，絕非無的放矢。