迪歷特
踏入7月中後，轉會窗活動同天氣一樣變得越加熾熱，原本上周前5大轉會交易依次為曹亞文尼、達雲紐尼斯、艾寧夏蘭特、李察利臣及拉芬夏比洛尼，全為當打中前場球員；近排列強發力重金簽中堅，身高5尺9吋嘅利辛度馬天尼斯同歐洲金童中堅馬菲斯迪歷特，準備分別過檔曼聯同拜仁，金額好大機會打入前5大；而31歲嘅高列巴尼去車仔要4,000萬歐元，好明顯急用被抬價。呢位非洲悍將上屆最後一次代表拿玻里踢歐洲賽鬥巴塞，一場波失4球，初登英超拍37歲嘅堤亞高施華，或者32歲、5呎10嘅艾斯派古達，可能係車仔最大弱點所在。
中堅唔值咁貴？利記2018年簽入華基爾雲迪積克，馬後炮睇係近年歐洲球壇最成功嘅收購之一。再睇拜仁今夏早入沙迪奧文尼代「羅拔仔」，前線全用速度型球員係靚簽；原來後著係重金聘馬菲斯迪歷特拍上屆簽入嘅烏柏美卡奴，「荷法」最強新星中堅聯手，爭德甲11連霸外，當然係失落兩屆嘅歐聯，呢種野心同視野，英超大球會都未必做得到。